Алматы әуежайына 200 млн доллар инвестиция салынады

TAV алдағы екі жылда Алматы халықаралық әуежайына 200 миллион доллар инвестиция салады. Бұл туралы компанияның бас директоры Сани Шенер мәлімдеді, деп хабарлайды Bugin.kz порталы. 

Қайғылы оқиғалар мен әуе айлағын басып алу туралы айта отырып, Шенер мұның инвестор үшін күтпеген жағдай екенін түсіндірді. Дегенмен, құрылыс жұмыстары басталып та кетті. Барлығы екі-үш жыл ішінде 200 миллион доллар инвестициялау жоспарлануда.

Шенер әуежайдың несиеге алынғанын, 450 миллион долларға сатып алынғанын еске салды. Сондай-ақ 15 пайыздық үлесі бар ресейлік серіктестік қоры бар.

- «Қазіргі жағдайда Алматы маңызды әуежайларымыздың бірі болып табылады. Ол біздің жалпы тауар айналымының 20 пайызын құрайды. Бірақ оның басқа әуежайлардан ерекшелігі Алматы әуежайы кірісінің 75 пайызы жүк, жерүсті қызметтері мен авиа жанар-жағармайдан түседі. Осылайша, жолаушылар бөлігі 25% құрайды. Сондықтан пандемияға байланысты немесе басқа себептерге байланысты әуежайдың жабылуы, сонымен қатар жолаушылар рейсінің қысқаруы немесе тоқтатылуы бізге аз әсер етеді. Ең бастысы әуе кемесі сол жерге қонады. Жүк ұшақтарын техникалық қондыру және жерде қызмет көрсету сияқты операцияларды жүзеге асыру басты міндетіміз», - деп атап өтті инвестор.

Ол осы себептерге байланысты компанияның Қазақстаннан кетуді жоспарламайтынын қосты. Шенер әуежайдағы жүк тасымалы қазірдің өзінде қайта жанданғанын айтты.

Сонымен бірге, Азаматтық авиация комитетінің мәліметінше, әуе айлағында жолаушылар рейсі 13 қаңтардан бастап қайта басталады. Төтенше жағдайға байланысты рейстер 8:00-ден 21:00-ге дейін орындалады.

Әуе айлағының баспасөз қызметі қауіпсіздік мақсатында әуежайға тек жолаушылар ғана кіруге рұқсат етілгенін атап өтті.