Футзалдан Қазақстан құрамасында ойнайтын Тоқаев шын мәнінде кім?

Жомарт Тоқаев футзалдан Қазақстан құрамасының Еуро-2022-дегі алғашқы ойынында әдемі әрі аса маңызды гол соқты. Бұл туралы Bugin.kz порталы Orda.kz сайтына сілтеме жасап хабарлайды.

Тоқаев кейінгі жылдары көзге түсе бастады. Аягөзден Алматы энергетикалық колледжіне, одан «Жетісу» командасына, одан кейін Қазақстан құрамасына шақырту алды.

Еске салайық, ұлттық құраманың қазіргі жұлдыздары – Дәурен Тұрсағұлов пен Біржан Оразов та мансабында осындай сатылардан өткен. Бірақ Жомарт қазақстандық футзалдың флагманы – «Қайратқа» әлі жеткен жоқ, оның кандидатурасы қазір алматылық клубта қарастырылып жатқан жоқ.

Жомарттың өзі де мойындағандай, жұрт оған ең алдымен ел президентімен туыстық байланысы туралы сұрайды. Бірақ шын мәнінде, Жомарт жай ғана аттас.

– Барлығы біздің президенттің есімі мен тегінің сәйкес келуіне үнемі назар аударады. Мен үйреніп қалдым. Бала кезімде бір қызық оқиға болды. Қасым-Жомарт Тоқаев премьер-министр болып тұрғанда, олар мені кезек күтпестен ауруханаға жатқызды, – деді ойыншы бұған дейін NewTimes.kz сайтына берген сұхбатында.

Тоқаевтың ойыны Қазақстан құрамасының жаттықтырушылар құрамын да елең еткізді. Жомарт ұлттық құрама сапындағы алғашқы ойынын өткен жылдың сәуір айында Еуро-2022 іріктеу кезеңінде Израильге қарсы ойында өткізген болатын. Ойыншы бірден өзін көрсете білді – екі кездесуде екі гол.