Елбасының тағы бір өкілеттілігін алып тастау ұсынылды

Елбасының Қауіпсіздік кеңесіне және Қазақстан халқы ассамблеясына өмір бойы төрағалық ету құзіреті тоқтатылады. Сенат депутаттары тұңғыш президентпен мемлекеттік бастамаларды келісу қажеттілігін де алып тастауды ұсынды, деп хабарлайды bugin.kz порталы.

«Заңды талқылау барысында бір норма енгізіліп отыр. «Тұңғыш Президент туралы» заңнан мемлекеттің ішкі және сыртқы саясатына байланысты бастамалары Елбасымен келісілуге тиіс деген норма алынып тасталғалы отыр. Сондықтан да сенат заңнамаға енгізілген өзгерістерді тұжырымдамалы түрде қолдап, бір өзгеріспен мәжіліске қайтарып отыр», - деді депутат Ләззат Сүлеймен сенаттың жалпы отырысында.

Жоғарғы палата бұрын айтылған барлық өзгерісті мақұлдады. Соның ішінде Елбасының Қауіпсіздік кеңесіне және Қазақстан халқы ассамблеясына өмір бойы төрағалық ету құзіретін тоқтату мәселесі де бар. Алайда тағы бір түзетуге байланысты заң жобасы төменгі палатаға қайтарылды.

Бұл түзетуді мәжіліс депутаттары қарайды. Ал қабылдаған жағдайда заң жобасы бірден президентке қол қоюға жіберіледі.