Көп балалы анаға Қанат Ислам сыйлаған үйді алаяқтар иемденіп алды

Ақмола облысы тұрғыны Гүлшат Баяділова көпбалалы ана. Оның төрт баласы бар. Бір ұлы бокстан жақсы нәтиже көрсетіп жатыр. Баланың дарынын Қанат Ислам да байқап қалған. 2019 жылы Қанат көпбалалы анаға 4 бөлмелі үй сыйлаған.

2020 жылы ақшадан тарыққан Гүлшат интернет арқылы тапқан адамдардан қарызға 500 мың алады. Олар көпбалалы анаға 1 млн береді, есесіне үйдің құжаттарын алып алады, деп хабарлайды bugin.kz порталы ztb_kazakhstan Instagram парақшасына сілтеме жасап.

Арада ай өткен соң қарыз берген адамдар хабарласып, нотариусқа алып барады. Ештеңе айтпастан қол қойдырып, әйелді шығарып салады. Әлгі қол қойған құжаты - сату келісімі екен.

Гүлшат келісім-шартты заңсыз деп анықтауды сұрайды. Тіпті видео үндеу де жариялаған:

«Менің момындығымды, сауатымның жоқтығын пайдаланып, осылай жасап жатыр. Қазір бірнеше сот болды, бірақ менің шаруам ешқалай шешіліп жатқан жоқ», - деп күйінді ана.