Путин жаңа жарлыққа қол қойды

Ресей президенті Владимир Путин «Ресей Федерациясының қаржылық тұрақтылығын қамтамасыз ету бойынша қосымша уақытша экономикалық шаралар туралы» жарлыққа қол қойды. Бұл туралы Кремльдің баспасөз қызметі хабарлады, деп хабарлайды Bugin.kz порталы.

Қаулыға сәйкес, 2 наурыздан бастап Ресейден Орталық банктің экспорт күніндегі бағамы бойынша 10 мың АҚШ долларынан асатын валютаны немесе «шетел валютасындағы ақша құралдарын» шығаруға тыйым салынды.

Сонымен қатар президент резиденттерге рубльдік несиелер беру, сондай-ақ Ресейге қарсы санкциялар салған мемлекеттермен байланысы бар шетелдік тұлғаларға бағалы қағаздар мен жылжымайтын мүлікті сату бойынша мәмілелер жасаудың ерекше тәртібін енгізу туралы шешім қабылдады.

Бұл шара «тіркелген жеріне немесе негізгі кәсіпкерлік қызметін жүзеге асыратын жеріне қарамастан» аталған шетелдік тұлғалардың бақылауындағы адамдарға да қатысты.

Бұл операцияларды жүзеге асыру үшін шетелдік инвестициялар жөніндегі үкіметтік комиссиядан рұқсат алу қажет болады, ал жылжымайтын мүлікпен және бағалы қағаздармен мәмілелер Қаржы министрлігімен келісім бойынша Орталық банктің рұқсаты негізінде ұйымдастырылған аукциондарда жасалуы мүмкін.

Сондай-ақ үкіметтік комиссия 28 ақпандағы қаулымен толығымен тыйым салынған операцияларға: бейрезиденттерге валюталық несиелер беруге және олардың шетелдегі шоттарына шетел валютасын аударуға рұқсат бере алады.

Құжатта айтылғандай, бұл қадамдар «АҚШ пен оларға қосылған шет мемлекеттер мен халықаралық ұйымдардың достыққа жатпайтын және халықаралық құқыққа қайшы әрекеттерінен» туындап отыр. Олар ұлттық мүдделерді қорғауға бағытталған.