Қорғаныс министрлігі Ресей мен Украина арасындағы қақтығысқа қатысты сауалға жауап берді

Қазақстан Ресей мен Украина арасындағы қақтығыста бейтараптықты ұстанады және ешбір тарапты қолдамайды. Бұл туралы Сенаттың жалпы отырысында Қорғаныс министрінің орынбасары Сұлтан Камалетдинов мәлімдеді, деп хабарлайды Bugin.kz порталы.

- «Ресей мен Украина арасындағы қақтығыстың Қазақстанға еш қатысы жоқ. Біз екі тарапты да қолдамаймыз. Бұл тұрғыда сұрақ туындауы мүмкін емес», - деп атап өтті Камалетдинов.

«Украинадағы жағдай біздің елде қайталанса, қазақстандық әскерлер дайын ба?» деген сауалға ол «бұл мәселе барлығын алаңдатып отырғанын» атап өтті.

- «Біз қарулы күштер, министр кешегі кеңесте сендіргендей, алға қойылған міндеттерді орындауға дайын деп сенеміз», - деді министрдің орынбасары.

Кейін Қорғаныс министрлігі бейбітшілік пен қауіпсіздікті сақтау жөніндегі халықаралық міндеттемелерді орындау үшін Қазақстан Қарулы Күштерінің әскери контингентін жіберу туралы шешімді Президенттің ұсынысы негізінде парламент қабылдайтынын мәлімдеді.

- «Парламенттің тиісті қаулысы қабылданбайынша, Қорғаныс министрлігінің белгілі бір мемлекетке әскери контингент жіберуге құзыры жоқ. Қазақстанның Қорғаныс министрлігі бұл мәселе бойынша келіссөздер жүргізіп жатқан жоқ», - деп атап өтті министрлік.