Кәрім Мәсімов ісі: ҰҚК дүние мүлкін көрсетті (фото)

ҰҚК Мәсімов ісінің егжей-тегжейі мен оның мүлкі туралы мәліметтерді айтты, деп хабарлайды Bugin.kz порталы.

«Ұлттық қауіпсіздік комитеті Мәсімовке және басқа да адамдарға мемлекетке опасыздық жасады, билікті күштеп тартып алуға дайындалды және қызметтік өкілеттігін асыра пайдаланды деген күдікпен қылмыстық істі тергеуді жалғастыруда. Сонымен қатар, тергеу барысында Мәсімовтің әрекетінде көптеген сыбайлас жемқорлық әрекеттерінің белгілері анықталды. Отандық бизнес өкілдері мен шетелдік құрылымдардан жылжымайтын мүлікті, қымбат сыйлықтарды, оның ішінде мәдени құндылықтарды, қомақты қаражатты заңсыз алу фактілері құжатталған», - делінген хабарламада.

Атап айтқанда, Мәсімовтің ҰҚК төрағасы ретінде жабық келісім-шарттардың бірі бойынша шет мемлекеттің өкілдерінен 2 миллион доллар көлемінде пара алғаны бойынша тергеу жүріп жатыр.

Бұл қаражаттың Гонконгтан Қазақстанның Ұлттық банкіне қайтарылуы қамтамасыз етілді.

Сондай-ақ Мәсімовтің премьер-министр кезінде бизнес құрылымдарының бірінен елордада құны шамамен 2,5 миллиард теңге болатын элиталық қонақ үй мен жер телімін алғаны бойынша да тергеу басталды.

Мәсімов ұсталған соң, 2022 жылдың қаңтарында бұл қонақ үйден 17,2 миллион доллар қолма-қол ақша, сондай-ақ көптеген сәнді заттар - сәнді сағаттар, алтын құймалар, антиквариат және т.б. тәркіленді.

Сонымен қатар оған тиесілі бизнес-кластағы 11 қымбат көлік тәркіленді.

Нұр-Сұлтандағы екі элиталық пәтер, Алматыдағы екі пәтер мен зәулім үй, сондай-ақ Щучье-Боровск курорттық аймағындағы көл жағасындағы 1 гектар жер учаскесі тәркіленді.

Мәсімовтің жақын адамдарынан 5,1 миллион доллар тәркіленіп, қамауға алынды.

Сонымен қатар Мәсімов пен оның айналасындағылардың шетел банктеріндегі есепшоттарына заңсыз алып кеткен бұдан да көп қаражатты іздеу, тұтқындау және Қазақстанға қайтару жұмыстары ұйымдастырылды.

Осы фактілердің барлығы бойынша белсенді тергеу және жедел-іздестіру шаралары жүргізіліп жатыр.