Ресей Канадаға да санкция салды

Ресей Канаданың 313 азаматын санкциялық тізімге енгізді, оның ішінде Канада үкіметі, Сыртқы істер министрлігі және Қорғаныс министрлігінің басшылары бар, деп хабарлайды Bugin.kz порталы РФ СІМ сайтына сілтеме жасап.

Осылайша, 15 наурыздан бастап премьер-министр Джастин Трюдо, Сыртқы істер және ұлттық қорғаныс министрлері Мелани Джоли мен Анита Ананд Ресей Федерациясына кіруге тыйым салынған тұлғалардың «қара тізіміне» енді. Канада Парламентінің Қауымдар палатасының мүшелерінің көпшілігі де тыйым салынғандардың қатарында.

Сонымен қатар, Канаданың халықаралық сауда министрі Мэри Анг, қоғамдық қауіпсіздік министрі Марко Мендицино, инновациялар және ғылым министрі Франсуа-Филипп Шампан, Қоғамдық даму министрлігінің басшысы Карина Гулд және елдің басқа да жоғары лауазымды тұлғалары ресейлік санкциялар тізіміне қосылды. 

Ресей Сыртқы істер министрлігі бұл шаралар «Оттаваның енгізген барлық жаңа санкцияларына» жауап ретінде енгізіліп жатқанын атап өтті.

Ресей Сыртқы істер министрлігі елге кіруге тыйым салу туралы шешім мәжбүрлі сипатта және «қазіргі канадалық режимнің әдептілік шеңберінен шығатын дұшпандық әрекеттеріне» жауап ретінде қабылданғанын атап өтті.