АҚШ Қазақстанда биозертхана салуға ақша бөлген

Ресей Сыртқы істер министрі Сергей Лавров Пентагон ескі кеңестік биологиялық зертханаларды жаңғыртуға инвестиция салып жатқанын айтты. Бұл жайлы Orda.kz ресейлік БАҚ-тарға сілтеме жасап жазды. 

МГИМО студенттері алдында сөйлеген сөзінде Сергей Лавров Пентагонға ресми өкілдердің қолдары қойылған биологиялық зертханаларды қаржыландыру туралы анықталған фактілер ұсынылғанда, американдық тарап барлық айыптауларды жоққа шығарғанын айтты.

"Бізге АҚШ әскерінің Украинада не істеп жатқанын жай ғана түсіндірудің орнына бәрі өтірік деп айтып жатыр", - деді Лавров.

Ресей СІМ басшысы Қазақстан Тәжікстан мен Өзбекстаннан үлгі ала отырып, биологиялық қауіп-қатер саласындағы ынтымақтастық туралы меморандумға қол қояды деп үміттенеді.

"Мәселе күрделі. Ал Пентагонның бұл мәселелерге қызығушылығы – бұрынғы кеңестік зертханалар, оларды модернизациялауға, онда жаңа нысандар құруға ақша салғаны өте қызық және нақтылауды қажет етеді. Бірақ біз бұл мәселелерді Қазақстанмен міндетті түрде шешіп, ҰҚШҰ-да үдерісті бастаймыз деп сенемін. Шешім принципті түрде қабылданды", - деді ол.

Ресей Федерациясының Сыртқы істер министрі Қазақстан БҰҰ Қауіпсіздік Кеңесінде биологиялық қару туралы конвенцияның сақталуын қадағалайтын агенттік құруды ұсынғанын атап өтті.

Айта кетейік, Ресей бұған дейін де Украинаны Пентагонмен бірігіп биологиялық қару жасап жатыр деп айыптаған еді. Ауруханаларды бомбалауын да осы уәжбен түсіндірген.

Тағы бір айта кетерлігі Қазақстан билігі Алматыда салынған биологиялық зертхананың АҚШ қаражатына салынғанын жоққа шығарып отырған жоқ. Алайда онда биологиялық қару сынақтан өтіп жатыр дегенге келіспейді.

"Американдық немесе басқа елдердің ғалымдары онда ешқандай сынақ жүргізбейді. Осы зертхананың арқасында біздің QazVac коронавирусқа қарсы вакцина әзірленді", - деген еді ҚР Сыртқы істер министрі Мұхтар Тілеуберді.