АҚШ Путиннің қыздарына санкция салды

АҚШ президенті Джо Байден Ресейге қарсы жаңа санкциялар пакетін жариялады, оны Украинаның Буча қаласындағы бейбіт тұрғындар қырғынға ұшыраған оқиғаға кінәлі деп санайтынын жеткізді. Бұл туралы Bugin.kz порталы Америка дауысына сілтеме жасап хабарлайды.

Санкциялар Ресей басшылығына және олардың отбасыларына, атап айтқанда, Ресей президенті Владимир Путиннің қыздарына, Сыртқы істер министрі Сергей Лавровтың әйелі мен қызына, сондай-ақ Ресей Қауіпсіздік кеңесінің мүшелеріне, оның ішінде бұрынғы президент Дмитрий Медведев пен премьер-министр Михаил Мишустинге қатысты болады. 

Ресейдегі ең ірі қаржы институттары Сбербанк пен Альфа-банк те санкцияларға ұшырады. Олардың АҚШ-тың қаржы жүйесіне қатысты барлық активтері бұғатталады. Енді америкалық компаниялар мен азаматтарға олармен бизнес жасауға тыйым салынады.

- «Осы бір жылдың ішінде біздің санкциялар Ресей экономикасы соңғы 15 жыл ішінде қосқанның барлығын жояды, өйткені біз Ресейді соңғы жартылай өткізгіштерді, кванттық технологиялардың құрамдастарын импорттау, интернет транзакцияларын қауіпсіз кодтау сияқты технологиядан ажыраттық. «ХХІ ғасырда бәсекеге қабілетті болып қалу үшін не қажет болса, біз Ресей экономикасының алдағы жылдарға өсу мүмкіндігіне тосқауыл қоямыз», - деді Байден.

- «Біз еуропалық одақтастарымызбен бірлесе отырып, ресейлік элитаның бір бөлігі болып табылатындардың аты-жөні мен санкцияға ұшыраған олардың отбасы мүшелерінің аты-жөнін қамтитын тізім жасап жатырмыз. Осы олигархтар ұрлаған орасан зор ақшаны елестетіп көріңізші. Олардың яхталары жүздеген миллион долларды құрайды. Бұл олигархтар мен олардың отбасы мүшелері бұдан былай капиталдарын Еуропа мен АҚШ-та сақтай алмайды және яхталарын, сәнді виллаларын пайдалана алмайды, ал Украинадағы балалар үйлерінен қашып жатыр. Ақырында, біз Украинаны украиндарға өз елін қорғауға қажет қару-жарақпен қамтамасыз етуді жалғастырамыз», - деді Америка президенті.

Сарапшылар Батыстың енгізген шараларының нәтижесі биыл Ресей экономикасының көлемін 15 пайызға қысқартады деп болжап отыр. Шамамен дәл осындай сома – 15 пайыздан сәл ғана астамы – Ресейде тұтыну бағасын өсірді.

Батыс сарапшыларының пікірінше, бұл санкциялардың салдарынан Ресей экономикасы үлкен держава мәртебесінен айырылуы мүмкін.