Сыбайлас жемқорлыққа қарсы қызмет Болат Назарбаевқа қатысы бар істі тергеп жатыр

Сыбайлас жемқорлыққа қарсы қызмет Болат Назарбаевтың өкілдерінің Алматы облысындағы шыны зауытын басып алуына қатысты істі тергеп жатыр. Бұл туралы Қазақстан Республикасы Бас прокурорының орынбасары Әсет Чиндалиев мәлімдеді, деп хабарлайды Bugin.kz порталы. 

— «Прокуратура нақты әрі дұрыс тергеу жүргізу үшін бар күш-жігерін салады. Қазір сыбайлас жемқорлыққа қарсы қызмет тексеріп жатыр. Біріншіден, олар прокурор объективті бағалайтын барлық дәлелдемелерді жинауы керек», — деді Әсет Чиндалиев.

Бірақ Чиндалиев тергеу құпиясына сілтеме жасай отырып, қандай істер тергеліп жатқанын айта алмайды.

Қандай шыны зауыты?

Әңгіме «Алматы Стекло» ЖШС-нің шыны бұйымдарын шығаратын зауыты туралы болып отыр. Ол жылына орта есеппен 100 миллион бөтелке мен банка шығарады. Зауыттың бас директоры Әзім Абдуллаевтың айтуынша, ол оны ағаларымен бірге ашқан. Кәсіпорын Алматы облысы, Қарасай ауданы, Жармұхамбет ауылында жеті гектар жерде орналасқан. Зауыт жылына бес миллион доллардан астам табыс әкеледі. Кәсіпорында 400-ден астам адам еңбек етеді.

Абдуллаевтың айтуынша 2006 жылы зауыт ашылғаннан кейін Елбасының інісі Болат Назарбаевпен табысын бөлісуге мәжбүр болған және 15 жыл ішінде ол Болат Назарбаевқа 60 миллион доллар төлеген.

«Алматы Стекло» компаниясының қазіргі қожайыны зауыттың толық қожайыны болып қана қоймай, Болат Назарбаевқа берген ақшаның кем дегенде жартысын қайтаруға үмітті. Ол қазірдің өзінде құқық қорғау органдарына арыз жазып, жауабын күтіп отыр.