Байден АҚШ конгресінен Украинаны қолдауға 33 миллиард доллар сұрады

АҚШ президенті Джо Байден Конгресске Украинаға жаңа көмек ретінде қосымша 33 миллиард доллар бөлу туралы өтінішін жолдады, деп хабарлайды Bugin.kz порталы РИА Новостиге сілтеме жасап.

Ақ үй таратқан мәліметке сәйкес, АҚШ әкімшілігі сұралған қаражаттың жалпы пакетінен Украинаға «әскери және қауіпсіздік саласындағы қосымша көмекке», сондай-ақ НАТО-дағы АҚШ одақтастарымен ынтымақтастықта еуропалық қауіпсіздікті нығайтуға 20,4 миллиардқа жуық қаражат бөлуді жоспарлап отыр.

Қаражат пакеті, басқалармен қатар, «Украинаға артиллерияның, броньды техниканың, танкке қарсы және зениттік қарудың қосымша бөлімшелерін үздіксіз жеткізуді» қамтамасыз етуге арналған.

Сонымен қатар, бұл қаражатты «киберсалада және әуе шабуылына қарсы қорғаныстың озық жүйелеріндегі мүмкіндіктерді нығайтуға, оқ-дәрілер мен стратегиялық маңызды пайдалы қазбаларды өндіруді ұлғайтуға, сондай-ақ кеңейтілген барлау қолдауын қамтамасыз етуге» бағыттау ұсынылады.

Бұған қоса, Байден Конгресстен Киевке қосымша 8,5 миллиард экономикалық көмек сұрады, бұл басқалармен қатар бизнесті қолдауға, сондай-ақ «Ресейдің жалған ақпараты мен насихатына қарсы тұруға» бағытталады.

Сондай-ақ, бұл қаражаттың бір бөлігі – 500 миллион доллар, Вашингтонның пікірінше, Украинадағы оқиғалардан туындаған әлемдік нарықтағы іркіліс жағдайында ауыл шаруашылығы өнімдерінің отандық өндірісін қолдауға жұмсалуы тиіс.