Қайрат Құдайбергенді сот босатпайтын болды

Сот мәслихат депутаты Қайрат Құдайбергенді қамауда ұстау туралы бұлтартпау шарасын өзгеріссіз қалдырды.

Алматы қалалық сотының баспасөз қызметі мәлім еткендей, 4 мамырда аппеляциялық сот отырысы өтті.

«Бүгін Алматы қалалық сотының қылмыстық істер жөніндегі сот алқасы қамауға алу санкциясын күшінде қалдырды, адвокаттардың жеке шағымдары қанағаттандырылмады. Бұған дейін тергеу соты іс-әрекетті саралау туралы шешім қабылданғанға дейін 30 тәулікке қамауға алу түріндегі бұлтартпау шарасын қолдануға санкция берген болатын», - делінген соттың хабарламасында.

Еске сала кетейік, 22 сәуір күні Депутат Қайрат Құдайберген қамауға алынған еді. Басты себеп – қаңтар оқиғасына қатысқаны үшін және оқиға кезінде «Дикий Арман» лақап атымен белгілі Арман Жұмалдиевтің жанында жүргені, сонымен байланыста болды деген күдік. Арман Жұмалдиев де қаңтар оқиғасына байланысты қамауда жатыр.