Желіде Каспийге қара сұйықтық ағып жатқан видео тарады: Экология департаменті не дейді?

Желіде Каспийге қара сұйықтық ағып жатқан видео тарады, деп жазады Bugin.kz порталы Lada.kz сайтына сілтеме жасап.

Теңізге қара сұйықтық ағып жатқан құбыр «Достар» жағажайы мен Keppel-Kazakhstan ЖШС арасында орналасқан.

Кадрлардан қанық қара түсті сұйықтық құбырдан күшті қысыммен ағып жатқанын көруге болады.

Аймақтың Экология департаменті өкілі Каспийге қара сұйықтық ағып жатқан жағдайға қатысты пікір білдірді.

ЖЭО-1 су тарту каналы ЖЭО-1 технологиялық қажеттілігіне байланысты теңіз суын жіберуге және бастапқы су ретінде «Каспий тұщыландыру зауыты» ЖШС-не ауыз су дайындауға арналғаны айтылды.

Портал мәліметінше, бүгінде Каспий теңізінің күрт таяздануынан су алу каналындағы су деңгейі төмендеген, кей жерлерде аралдар пайда болған.

Арнадағы теңіз суының деңгейін ұстап тұру және ЖЭО-1 мен «Каспий тұщыландыру зауыты» ЖШС технологиялық процесінің тоқтауын болдырмау үшін «МАЭК-Казатопром» ЖШС ЖЭО-1 су тарту арнасының түбін тереңдету жұмыстарын жүргізеді.

Бұл жұмыстар жер снаряды арқылы механикалық жолмен жүргізіледі, ал каналдан айдалатын су - басқа қоспаларсыз кәдімгі теңіз суы.

«МАЭК-Казатопром» ЖШС ақпараты бойынша, жүргізіліп жатқан жұмыстар Каспий теңізінің экологиялық қауіпсіздігіне әсер етпейді.

Сондай-ақ Экология департаменті өкілі ведомство мамандары оқиға орнына кеткенін айтты.

Видеоны осы сілтеме арқылы көре аласыз.