Қазақстанда қант қоры жеткілікті ме?

ҚР Ауыл шаруашылығы министрлігі елдегі қант қорын есептеп шығарды. Бүгінде олар 26,8 мың тоннаны құрайды.

Қазақстандағы қант өндірісі зауыттардың жедел деректері бойынша маусым айында шамамен 38 мың тоннаны құрады, оның ішінде Тараз қант зауыты 18 мың тонна, Көксу – 9 мың тонна, Меркенде – 11 мың тонна өндірді.

Маусым айында үшінші елдерден бажсыз әкелу квотасы аясында 23,5 мың тонна өнім әкелінді. Маусым айының басындағы қорлар әкімдіктердің мәліметі бойынша 28,9 мың тоннаны құрады. Шілде айының басында Қазақстан Республикасындағы қанттың тасымалдау қоры 27,2 мың тоннаны құрады. Зауыттардың мәліметінше, шілде айында 37 мың тонна өнім шығару жоспарланып отыр, ал оның импортының күтілетін көлемі 39,7 мың тоннаны құрайды.

11 шілдедегі жағдай бойынша республикадағы қант қоры 26,8 мың тоннаны құрайды.

Ішкі нарықты толтыру үшін Ауыл шаруашылығы министрлігі 250 мың тонна көлемінде қант пен шикі құрақты бажсыз әкелуге квота бөлді. Қалған 100 000 тоннаны бөлуге өтінімдер қабылданып жатыр. Квота мерзімі 31 қазанға дейін ұзартылды. Төрт жұмыс тобы құрылды (зауыттармен, облыс әкімдіктерімен, Қазақстан Республикасы Қаржы министрлігінің Мемлекеттік кірістер комитетімен, «ҚТЖ» ҰК» АҚ-мен), оның аясында өңірлер бойынша көлемді жедел бөлу жүргізілуде. Өндіріс пен жеткізудің апталық кестесі әзірленді. Бұл ретте тораптық станцияларда тоқтап қалудың алдын алу мақсатында өнімдерді тасымалдау үдерісі бақыланады.

Үкімет сонымен қатар ішкі қант нарығындағы жағдайды бес жылдық кезеңге тұрақтандыру жөніндегі іс-шаралар жоспарын бекітті. Оның аясында қант қызылшасының егіс көлемін ұлғайту, суару желілерін қайта құру және салу, қант зауыттарын жаңғырту, ішкі нарықты қорғау, мемлекеттік қолдау шараларын қамтамасыз ету жоспарлануда.

Осылайша министрлік ішкі нарықты қантпен қамтамасыз ету үшін тиімді шараларды қолға алуда.