Қытайда халық саны өспей жатыр, енді азаюы мүмкін

Қытайда халық саны өспей жатыр. Демографиялық өсім тоқтады. Ал 2025 жылдан кейін Қытайдағы халық саны азаюы мүмкін. Осылай деп жазады Reuters басылымы.

Елде халық санының тоқырауға ұшырап, дағдарысқа тап болғанын Қытайдың денсаулық сақтау жөніндегі Ұлттық комиссиясының бөлім басшысы Ян Вэньчжуан мәлім етті.

Оның айтуынша, қазір Қытайда демографиялық жағдай біршама қиын, табиғи өсім азайып барады.

«Оған негізгі себеп – жастардың үйленбеуі. Жастар елде өмір сүру қымбат әрі жан бағу қиын болғандықтан, көбісі бас құрағысы келмейді», - деп түсіндіреді ол.

2021 жылғы туу көрсеткіші соңғы 10 жылдағы ең төменгі туу көрсеткіші боп шыққан. Қытайдың ірі провинцияларының бірі – Хунаньда былтыр 500 мыңға жетер-жетпес бала туған. Әрі 60 жылда бұл бірінші рет болып тұр.

Оңтүстік провинция – Гуандунда ғана 1 млн бала дүниеге келген.

Былтыр Қытай үкіметі "бір жанұя – бір бала" ұстанымынан бас тартып, бір әйелге үш бала дүниеге әкелуге рұқсат берген. Бірақ бұдан пайда әлі аз сияқты.