Айсұлтанды еске алу турнирінде Дариға Назарбаева бой көрсетті

Нұр-Сұлтан қаласында футболдан Айсұлтан Рахатты еске алу турнирі өтті. Жыл сайын ұйымдастырылатын турнирдің жеңімпаздарына Дариға Назарбаева сыйлықтар үлестірді, деп хабарлайды Bugin.kz порталы КТК арнасына сілтеме жасап.

Нұр-Сұлтан, Алматы, Қарағандыдан келген 9-11 жас аралығындағы жас спортшылардың жарысы «Астана Арена» стадионында өткен. Жарысқа 150-ге жуық бала келген.

Екі күнге созылған турнирде  «Астана» балалар футбол клубы жеңіске жеткен. Турнирдің күміс жүлдесін  Қарағандылық «Шахтер» командасы, ал қола жүлдені алматылық «Қайрат» жеңген.

Телеарнаның сюжетінде Қазақстанның экс-президентінің қызы Дариға Назарбаеваның жүргенін көруге болады. Ол жарыста жеңіске жеткен балаларға сыйлықтар беріп, бірге естелікке суретке түскен.

Айсұлтан Рахат (Назарбаев) – марқұм Рахат Әлиев пен Дариға Назарбаеваның ұлы. Айсұлтан 2020 жылдың 16 тамызына қараған түні Лондонда қайтыс болды. Оның жүрегі тоқтап қалғаны айтылады.