Си Цзиньпин Қазақстанға келеді

Қыркүйек айында Қытай Халық Республикасының Төрағасы Си Цзиньпин Қазақстанға мемлекеттік сапармен келеді. Бұл туралы Сыртқы істер министрлігінің ресми өкілі Айбек Смадияров мәлімдеді, деп хабарлайды Bugin.kz порталы.

«ҚР Президенті Қасым-Жомарт Тоқаевтың шақыруымен ҚХР Төрағасы Си Цзиньпиннің Қазақстанға мемлекеттік сапары 14 қыркүйекте жоспарланған. Сапар аясында екі мемлекет басшылары арасында екіжақты келіссөздер жоспарлануда, сондай-ақ ынтымақтастықтың түрлі салаларында екіжақты құжаттарға қол қойылады», - деді Смадияров Сыртқы істер министрлігінде өткен брифингте.

Оның айтуынша, сапар Қазақстан мен Қытай арасындағы мәңгілік жан-жақты стратегиялық әріптестікті одан әрі тереңдету, саяси, сауда-экономикалық және мәдени-гуманитарлық ынтымақтастықты дамытуға бағытталған. Ол бұл сапар Си Цзиньпиннің пандемия басталғаннан бергі алғашқы шетелдік сапары болатындығын атап өтті.