Сән-салтанат салығы: миллионерлерді алда не күтіп тұр?

Елімізде салтаннатты өмір үшін тұрғындар салық төлейді. «Сән-салтанат» салығын кімдер төлейтіні туралы Орталық коммуникациялар қызметінде өткен брифингте Ұлттық экономика министрі Әлібек Қуантиров айтты. Бұл туралы Bugin.kz порталы министр сөзіне сілтеме беріп хабарлайды.

Президент бұрын жариялаған «сән-салтанат салығы» жылжымайтын мүлікке, автокөліктерге және жоғары немесе тіпті инвестициялық құны бар басқа да сәнді заттарға әсер етеді.

«Сән-салтанат салығы белгілі бір құны қымбат, тіпті инвестициялық құны бар жылжымайтын мүлік, көлік және басқа да сән-салтанат нысандарына қолданылады. Құнына байланысты үдеме болады. Мысалы яхталар, спорттық автомобильдер, шетелдік виллалар, жеке ұшақтар. Бұларға сән-салтанат салығы қолданылатын болады», - деді министр ОКҚ брифингінде. 

Бірақ мұндай салықты Қазақстанда қанша адам төлейді? Министрдің айтуынша, елімізде мұндай азаматтар аз.

«Менің ойымша, көліктің ең төменгі бағасы туралы мәселе қаралады. Бұл мәселе Салық кодексі аясында халық, сарапшылармен талқыланады. Шартты түрде жоғары салық салынатын көлік құны 100-150 мың доллардан басталады, мүмкін одан да жоғары болуы мүмкін. Біраз градация болады. Жылжымайтын мүлікке де қатысты. Жылжымайтын мүлік сәйкесінше жоғары бағаланады. Жылжымайтын мүліктің өзі жылжымалы мүлікке қарағанда қымбатырақ.

Шартты түрде көлік құнына ең төменгі шекті алайық, 150 мың доллар болсын, құны 60 миллион теңгеге жуық көліктер аз емес. Мен иелердің нақты санын айта алмаймын. Біреудің көлігі миллион доллар тұрады. Елімізде мұндай көлік иелері санаулы ғана шығар. Яхталар, ұшақтар сияқты нәрселерге де қатысты, менің ойымша, мұндай адамдар көп емес», - деп қосты ол.