Қазақстанда ең жоғары жалақыны кімдер алады?

Еңбек министрлігі 2022 жылдың тамызында ең жоғары жалақы алатын қазіргі мамандықтардың тізімін жасады. Қазіргі уақытта Электрондық еңбек биржасында 119,9 мың бос жұмыс орны мен 93,9 мың түйіндеме орналастырылған.  

Жоғары жалақы  

2022 жылдың шілдесімен салыстырғанда жоғары білікті мамандарға сұраныс екі есе өсті, бұл бос жұмыс орындарының жалпы санының үштен бірін құрайды. Аймаққа және мамандыққа байланысты жалақы әртүрлі. 

Осылайша, ең жоғары жалақы Атырау облысында ұсынылып отыр, мұнда өнеркәсіптік альпинистер үшін жалақысы 824 мың теңгені құрайтын 20 бос жұмыс орны бар. Нұр-Сұлтан мен Алматыда, сондай-ақ Алматы мен Шығыс Қазақстан облыстарында мемлекеттік органдардағы құрылымдық бөлімшелердің басшылары 500 мыңнан 730 мың теңгеге дейін төлеуге дайын.  

Жұмыс берушілер мемлекеттік ұйым басшыларына – 640 мың теңге, бас технологтар мен қаржылық тәуекел менеджерлеріне – 500 мың теңге ұсынады.  

Түйіндемелер тізіміне сәйкес, ең жоғары жалақыны ғалымдар – 2,7 млн теңге, бас директорлар – 2,3 млн теңге, авиация инженерлері – 1,6 млн теңге, шахта директорлары – 1,5 млн теңге және қосымшаларды әзірлеушілер – 1,2 млн теңге алғысы келеді.  

Орташа жалақы  

Орташа білікті мамандар нарығында бос жұмыс орындарының саны ұсыныстар санынан 1,7 есе асып түсті. Бұл ретте біліктілігі төмен кадрларға сұраныс аздап өсті, небәрі 6%-ға.  

2022 жылдың тамыз айының қорытындысы бойынша елімізде ұстаздар мен құрылысшылар тапшылығы сезіледі.  

Білім саласындағы мамандардың тапшылығы Алматы облысында (4,4 мың бос орын), Қарағанды (3,1 мың бос орын) және Алматы қаласында (3,8 мың бос орын) байқалады.  

Екінші орында 4,4 мың бос жұмыс орнын жариялаған құрылыс саласының кәсіпорындары. Құрылыс секторында жоспарланған жұмыстың 70 пайызы үш аймаққа тиесілі: Шығыс Қазақстан, Жамбыл облыстары және елорда.  

Үшінші орында 4000 бос жұмыс орны орналастырған ауыл шаруашылығы кәсіпорындары. Бұл ретте оның үштен бірі Түркістан облысында.  

«Тамыз айының қорытындысы бойынша жұмыс берушілер тарапынан белсенділіктің артуы байқалды, оның айтарлықтай үлесі білім беру ұйымдарына тиесілі. Бұл оқу жылының басталуымен байланысты болды: шілде айымен салыстырғанда білім саласындағы бос орындар саны үш есеге артып, 34,2 мыңды құрады. Айта кетейік, 2021 жылдың сәйкес кезеңімен салыстырғанда педагогтар мен мамандарға сұраныс артқан. Мектепке дейінгі білім беруде 24%-ға өсті», - деп түсіндірді «Адам ресурстарын дамыту орталығы» АҚ Стратегия және жобаларды басқару департаментінің талдау бөлімінің басшысы Ұлпан Шегенова.  

Осылайша, бос жұмыс орындары мен түйіндемелердің айтарлықтай өсуі кәсіпкерлік белсенділіктің дәстүрлі маусымдық қайта жандануын көрсетті.