Енді әйелдер 65 жасқа дейін жұмыс істейді

Швейцария тұрғындары референдумда әйелдердің зейнетке шығу жасын 64-тен 65-ке көтеруге дауыс берді, - деп хабарлайды Bugin.kz порталы Deutsche Welle агенттігіне сілтеме жасап.

Швейцария үкіметінің мәліметінше, зейнетақы жүйесіндегі өзгерістер 50,57 пайыз дауыс жинап, барлық кантондарда дауыстарды санау аяқталды. Сонымен қатар, швейцариялықтар зейнетақы қорындағы тапшылықты жою үшін құн салығын арттыруға дауыс берді.

«Енді әйелдер ерлер сияқты 65 жасқа дейін жұмыс істейді. Азаматтар зейнетақы реформасының екі элементін де мақұлдады», - делінген хабарламада.

Швейцарияның Экономика министрлігінің мәліметінше, 2020 жылы әйелдер ерлерге қарағанда орта есеппен 35 пайызға дерлік аз зейнетақы алған. Дауыс беру алдында жүргізілген сауалнамалар ерлердің 70 пайызы реформаны қолдаса, әйелдердің 42 пайызы ғана қолдайтынын көрсетті.

Сату салығын көтеру арқылы реформаны қаржыландыруды ұлғайту үшін бөлек дауыс беруді сайлаушылардың 55 пайыздан астамы қолдады.

Бұған дейін Қазақстанда әйелдердің зейнетке шығу жасы 2028 жылға дейін 61 жас болып бекітілетіні хабарланған болатын.