Украинада 30 қыркүйекте не болды?

Қақтығыс аймағындағы жағдайлар шиеленісуде. Сондықтан Украина жайлы ақпараттар өте өзекті болып тұр. Назарларыңызға 30 қыркүйек күні таңертең Украинада болған оқиғалар туралы ең маңызды жаңалықтар топтамасын ұсынамыз!

Қауіпсіздік және қорғаныс күштерінің шұғыл жиналысы шақырылды

Украина президенті Владимир Зеленский қауіпсіздік, саяси және қорғаныс саласының жоғары лауазымды тұлғаларымен шұғыл жиын өткізеді. Ұлттық қауіпсіздік және қорғаныс кеңесінің құрамына Қарулы Күштердің Бас қолбасшысы, қорғаныс, сыртқы істер министрі мен премьер-министрі, сондай-ақ Украина қауіпсіздік қызметінің басшысы кіреді. Оның міндеті – президентпен бірге ұлттық қауіпсіздік саясатын әзірлеу және үйлестіру.

Байден Ресейдің Украинадағы референдумының нәтижелерін мойындамауға уәде берді

АҚШ президенті Джо Байден «ешқашан, ешқашан, ешқашан» Украинадағы Ресей референдумының нәтижелерін мойындамайтынын айтты. Вашингтонда Тынық мұхиты аралдарының басшыларымен кездесуінде:

«Референдум абсолютті жалған. Нәтижелер Мәскеуде ойдан шығарылды. Ресейдің Путиннің империялық амбициясын көздеп, Украинаға шабуыл жасауы БҰҰ Жарғысы мен егемендік пен аумақтық тұтастықтың негізгі қағидаттарын өрескел бұзу болып табылады», - деді ол.

Энтони Блинкен де Мәскеуді референдум арқылы «жерді басып алды» деп айыптады

«Кремльдің жалған референдумдары - Украинадағы жерді басып алудың кезекті әрекетін жасыру», - деді дипломат мәлімдемесінде.

Путин Херсон мен Запорожьенің тәуелсіздігін тану туралы жарлықтарға қол қойды

Ресей президенті Владимир Путин Херсон және Запорожье облыстарын тәуелсіз аумақтар деп тану туралы екі жарлыққа қол қойды. Құжаттарда мемлекет басшысы БҰҰ Жарғысында бекітілген халықаралық құқықтың жалпыға бірдей танылған қағидаттары мен нормаларына, халықтардың тең құқықтары мен өзін-өзі билеу принципіне сілтеме жасайды. Жарлықтар қол қойылған күннен бастап күшіне енеді.

Америкалық заң шығарушылар Украинаны қолдауға шақырды

Америкалық заң шығарушылар Украинаны қолдауға шақырды, өйткені АҚШ Конгрессінің Өкілдер палатасы 30 қыркүйекте Украинаға 12,3 миллиард доллар көлемінде әскери және экономикалық көмек көрсету туралы заң жобасын қабылдауы тиіс.

Путин мобилизация кезінде жіберілген «барлық қателіктерді» түзетуді талап етті

Ресей президенті Владимир Путин ішінара жұмылдыру кезінде жіберілген қателіктерді тез әрі мұқият шешуді талап етті. Ол барлық қателерді түзетіп, қайта жол бермеу керектігін айтты. Мәселен, көп балалы әкелерді, созылмалы дертке шалдыққан, әскер жасынан шыққан адамдарды мобилизацияға шақыру мүмкін емес.

«Осының барлығын әбігерге салмай, байсалды, бірақ тез, егжей-тегжейлі, мұқият реттеу керек. Егер қателік болса, оны түзету керек, себепсіз шақырылғандарды үйлеріне қайтару керек», -деп талап етті ол.

Трамп Ресей мен Украина арасындағы келіссөздерде делдал болуды ұсынды

АҚШ-тың бұрынғы президенті Дональд Трамп Truth әлеуметтік желісінде Ресей мен Украина арасындағы келіссөздерді басқару керек пе деп сұрады.

«Стратегиялы, ақылды болу керек. Қазір мәміле екі жаққа да керек. Бүкіл әлемге қауіп төніп тұр. Мен келіссөз тобын басқарамын ба?» деп жазды.

Трамп сонымен қатар «Солтүстік ағын» құбырының диверсияға ұшырағанына сенім білдіріп, «ауыр шиеленісу немесе соғыс» қаупін ескертті.

Зеленский тағы да Германиядан қосымша қару сұрады

Украина президенті Владимир Зеленский канцлер Олаф Шольцпен телефон арқылы сөйлескен кезде Германияны тағы да қару-жарақ жеткізуге шақырғанын айтты.

«Қорғаныс тақырыбында мен Германиядан зымыранға қарсы қорғаныс жүйесін күтіп отырғанымызды атап өттім. Мен Германияның әуе қорғанысына көмектесуге дайындығы үшін алғыс айтамын», - деді Зеленский күнделікті видео үндеуінде.

Зеленский Германия канцлерімен басқа да бірқатар тақырыптарды, соның ішінде «Солтүстік ағын» газ құбырына жасалған диверсияны талқылағанын айтты. Ол сондай-ақ ЕО-ның Ресейге қарсы жоспарланған жаңа санкциялар пакеті «символдық қана емес, шын мәнінде күшті» болуы керек деп сендірді.

Кремль Ресейге жаңа аумақтарды енгізу туралы келісімге қол қояды

Президент Владимир Путиннің қатысуымен төрт жаңа аумақты (Донецк, Херсон, Луганск және Запорожье облыстары) қосу туралы келісімдерге қол қою рәсімі 30 қыркүйекте Кремльдің Георгий залында парламентарийлердің қатысуымен өтеді. Кремльдің баспасөз хатшысы Дмитрий Песков салтанатты шара барысында төрт аймақтың басшылары Ресейге қосылу туралы келісімдерге қол қоятынын айтты.

Дереккөз: tengrinews.kz