Путин Астанада өткен саммитте не айтты?

Ресей президенті Владимир Путин Азиядағы өзара іс-қимыл және сенім шаралары кеңесінің (АӨСШК) VI саммитінде Қазақстанның төрағалық бастамаларын қолдайтынын айтты, деп хабарлайды Bugin.kz порталы.

«Бүгінгі кездесу жаһандық саясат пен экономикадағы елеулі өзгерістер аясында өтіп жатыр. Әлем шын мәнінде көпполярлы болып келеді. Ал Азия бұл ретте маңызды рөл атқарып отыр», - деді Ресей президенті.

Ол өз сөзінде Ауғанстан аумағындағы жағдайды қалыпқа келтіру үшін «оның экономикасының дамуына бірлесіп жәрдемдесу қажет» деп атап өтті. Путин «басқыншылық жылдарында ауғандықтарға келтірілген шығынды өтеуге және заңсыз бұғатталған ауған қаражатын босатуға» шақырды.

«Азиядағы көптеген серіктестеріміз сияқты біз де әлемдік қаржы жүйесінің жұмыс істеу принциптерін қайта қарауды бастау қажет деп есептейміз. Ол ондаған жылдар бойы өзін-өзі жариялаған алтын миллиардқа жол беріп, капитал мен технология, негізінен біреудің есебінен өмір сүру сынды ағындарды жауып тастады. Бірінші қадам ретінде біз өзара есеп айырысуда ұлттық валюталарды белсендірек пайдалануды көріп отырмыз. Мұндай шаралар, біздің мемлекеттеріміздің қаржылық егемендігін нығайтуға, ішкі капитал нарықтарын дамытуға және аймақтық экономикалық интеграцияны тереңдетуге көмектеседі», - деп қосты Владимир Путин.

Путин сондай-ақ Ресей АӨСШК-нің барлық елдерімен қарым-қатынасын дамытатынын мәлімдеді.

«Тұтастай алғанда, кездесудегі бірлескен жұмыс оң нәтиже беріп жатқанын қанағаттанарлықпен атап өте аламын. Ресей осы кездесуге қатысқан барлық елдермен ынтымақтастықты дамытуды жалғастырады. Біз Қазақстанның төрағалығының бастамаларын қолдаймыз», - деп түйіндеді сөзін Владимир Путин.

Астанада Азиядағы өзара іс-қимыл және сенім шаралары кеңесінің VI-шы саммиті өтуде. Шараға 11 мемлекеттің басшылары қатысуда.