Тоқаев: «Ескерткіш орнатқаннан гөрі, спорт нысандарына көңіл бөлген абзал»

Мемлекет басшысы Қасым-Жомарт Тоқаев Атырау облысындағы спорттың дамуы туралы айтты, деп хабарлайды Bugin.kz порталы.

Президент облыс жұртшылығымен кездесуінде балалар мен жастардың денсаулығын жақсарту үшін дамыған және қолжетімді спорт инфрақұрылымының болуы маңызды екенін атап өтті.

Ол өңірдегі көптеген спорт нысандарының күрделі жөндеуді қажет ететініне назар аударды. Сондай-ақ республикалық және халықаралық жарыстарды өткізуге мүмкіндік беретін жаңа кешендерді салу қажеттігін жеткізді.

«Осы орайда, спорт инфрақұрылымын дамытып, оны барынша қолжетімді ету – маңызды міндеттің бірі. Өңірдегі көптеген спорт нысанына жөндеу жүргізу қажет. Сонымен бірге, республикалық және халықаралық жарыстар өткізетін жаңа спорт кешендерін салу керек.

Жалпы, көп шығынды талап етпейтін спорт түрлерін дамытқан жөн. Мысалы, шахмат, үстел теннисі, тоғызқұмалақ, садақ ату, қазақша күрес, тағы басқа. Бұл қадам, ең алдымен, балаларымызды теріс әдеттен алыстатады және спорт залдарының тапшылығын азайтуға мүмкіндік береді. Әкімдікке осы шаруаларды пысықтауды тапсырамын.

Тағы бір айтайын дегенім, ескерткіштер қоя бергеннен гөрі, спорт және медицина нысандарын салуға баса назар аудару қажет. Бұл Атырау облысына ғана емес, бүкіл елімізге қатысты мәселе» - деді президент.