«Путиннің соғыста аман қалатынына кепілдік жоқ» - Бен Ходжес

«Сәрсенбіде Ресей күштерінің Херсонды тапсыруы жеңілістер тізіміндегі соңғы жағдай емес, нәтижесі Ресей мен Қырымның жойылуына дейін апарады әрі Путиннің жиырма жылдық билігін аяқтайды». Бұл пікірді Еуропадағы АҚШ әскерлерінің бұрынғы қолбасшысы, отставкадағы генерал Бен Ходжес айтты, деп хабарлайды Bugin.kz порталы.

«Мен Путиннің жоғалтатын аумағы Қырым үшін шайқас болады деп болжаймын», - деп жазды Ходжес Твиттер әлеуметтік желісінде.

Оның сөзінше, түбекке әсер ететін әскери науқанның шешуші кезеңі 2023 жылдың жазында өтеді. Содан кейін Путин билігінен айырылуы мүмкін.

«Ол (Путин) келесі жылдың соңына дейін Кремль үшін ішкі шайқаста жеңіліп қалады», - деді Бен Ходжес.

Ирак пен Ауғанстандағы соғысты көрген, 2014-2018 жылдары Еуропадағы америкалық күштерді басқарған генерал Ходжестің айтуынша, Путиннің Украинадағы соғыстан аман қалатынына кепілдік жоқ.

«Менің ойымша, бәріміз Ресейдің бұрынғы әдетінше жеңіліске ұшырайтынына таңғалмауымыз керек», - деп жазады Ходжес.

Оның айтуынша, мұндай жағдайға Шешенстан басшысы Рамзан Қадыров пен жақында «Вагнер» ПМК-мен байланысын мойындаған кәсіпкер Евгений Пригожин дайындалуда. Екеуі де бұқаралық ақпарат құралдарында командирлікті сынау және нұсқаулар беру арқылы күшейе түсті, сонымен қатар іс жүзінде өз әскері бар.

Ходжестің сөзінше, Ресей армиясының проблемасы - адамдардың соғысқа зауы жоқ болуы.

«Әскерге шақыру науқанында 500 мың ер адам жұмылдырылмас үшін елден қашып кетті», - дейді ол.

Еске салайық, бұған дейін Ходжес Ресейдің дәл КСРО сияқты ыдырауына дайын болуға шақырған.