Жамбыл облысында алтын өңдейтін жерасты цехы анықталды (Видео)

Жамбыл облысында заңсыз алтын өңдейтін жерасты цехы анықталды. Полиция цехтың 37 жастағы қожайынын ұстады, деп хабарлайды Bugin.kz порталы.

Полиция қызметкерлерінің мәліметінше, «Браконьер» жедел алдын алу іс-шарасы барысында Мойынқұм ауданының полицейлері құрамында бағалы металдар бар шикізат пен тастарды заңсыз өңдеумен айналысатын жерасты цехының қызметін тоқтатқан.

Жеке тұрғын үйді тексеру кезінде электрлік ұнтақтау диірмені, ұнтақталған кеннің қалдықтары, елек, магнит, таситын арбалар, күректер, сынапты сұйықтық, екі үлкен қазандық және 10 тоннаға жуық алтын кені табылды.

Сондай-ақ қоймада 30 және 58 жастағы екі жұмысшы болған. Ұсталғандардың айтуынша, олар ақылы түрде жұмыс істеген. Бұған қоса, полиция қызметкерлері 37 жастағы цехтың қожайынын ұстады.

Бұл дерекке қатысты Қылмыстық кодекстің 295-1-бабы 1-бөлігі («Бағалы металдар мен асыл тастардың, құрамында бағалы металдар бар шикізат тауарларының заңсыз айналымы») бойынша сотқа дейінгі тергеп-тексеру амалдары басталды. Қазір мемлекетке келтірілген залал көлемі анықталып жатыр.