Израиль: Қатарда өтіп жатқан ӘЧ-да Иран шабуыл жасайды

Израильдің әскери барлау басшысы генерал-майор Аарон Халива Иранның Қатарда өтетін әлем чемпионатына шабуыл жасауға дайындалып жатқанын ескертті. Бұл туралы Bugin.kz порталы The Times of Israel басылымына сілтеме жасап хабарлайды.

Аарон Халиваның айтуынша, жалпыұлттық наразылықтар «азаматтық көтеріліске» айналғандықтан, Иранның саяси режимі орасан зор қысымға ұшырады.

«Өлім саны, ұлттық рәміздерге жасалған шабуылдар режимді қатты алаңдатады. Әсіресе санкция, халықаралық қысым және экономикадағы қиындықтар осыған себеп болып отыр», - деді ол Иран билігінің толқуларының себебін түсіндіріп.

Израиль генералының болжамынша, билік ел ішіндегі жағдайға қатты алаңдап, мұны саяси тәртіптің өмір сүруіне қауіп деп санайды. Дегенмен, оның айтуынша, режим әзірше құламайды.

«Бірақ Иранға қысым күшейген сайын (Батыс елдері салған санкциялар), ішкі қысымды қоса алғанда, Иранның жауабы әлдеқайда агрессивті болады. Сондықтан біз аймақ және әлем бойынша әлдеқайда агрессивті жауаптар болатынын күтейік», - деп ескертті генерал-майор Халива.

Израиль қорғаныс министрі Бенни Ганц генерал-майор Ахарон Халиваның тұжырымдарымен келісіп, Тегеранның аймақтағы тұрақсыздықты кеңейту мүмкіндігін іздеп жатқанын атап айтты.

«Әлем чемпионаты тұрақсыздық тудыруға тырысатын оқиғалардың бірі болуы мүмкін», - деді Ганц.

Иранда қыркүйектің ортасынан бері наразылықтар мен тәртіпсіздіктер өтіп жатыр. Оларға хиджаб кигені үшін полиция ұстап, қайтыс болған Махса Аминидің өлімі түрткі болды. Шерушілерді Иранның көптеген қоғам қайраткерлері қолдады, соның ішінде ұлттық құрама ойыншылары да бар. Олар сондай-ақ 2022 жылғы әлем чемпионатында топтық кезеңнің бірінші турында Англияға қарсы ойын алдында әнұран айтудан бас тартты.