«Ресейден қорықпаймыз»: Мәжіліс төрағасы сұраққа нық жауап берді

Мәжілістің кулуарында Ерлан Қошановқа «Қазақстанда Ресей билігіне қарсы пікір білдірген адамдар жауапқа тартылады. Алайда ресейліктер бізге қатысты ойына не келсе, соны айта береді? Неге олар жауапқа тартылмайды? Біз Ресей тәуелдіміз бе? Одан қорқамыз ба?» деген сұрақ жолданды, деп хабарлайды Bugin.kz порталы.

«Біз Ресейге тәуелді емеспіз. Ресейден қорықпаймыз. Біз терезесі тең, егеменді мемлекетпіз. Біріншіден, барлық мәселе заң аясында жүргізіледі. Екіншіден, Қазақстанға қарсы сөз айтқан Ресей азаматы немесе басқа ел азаматтарының пікіріне қатысты Президенттен бастап, депутаттар, Сыртқы істер министрлігі өз жауабын беріп жүр. Оны сіздер естідіңіздер», - деді  Мәжіліс төрағасы Ерлан Қошанов

Мәжіліс спикерінің сөзінше, кейбір журналистердің айтып жүргені пікірі Ресейдің ресми ұстанымы әрі ресми мәлімдемесі емес.

«Бұл – жекелеген азаматтарының жауапкершілігі және пікірі. Оларға жауапты Президент те, Сыртқы істер министрлігі де, депутаттар да беріп жүр. Егер ол жерде біздің тарапымызға деген заң бұзу  болса, онда біздің Бас прокуратура арқылы Ресейдің бас прокуратурасына талаптар жолданады», - деді Ерлан Қошанов.