Ақтөбеде мұзға аяғы тайып құлаған азамат мерт болды

Ақтөбеде 51 жастағы ер адам баспалдақтан тайғанап мерт болды, деп хабарлайды Bugin.kz порталы «Диапазон» агенттігіне сілтеме жасап.

Басылым мәліметінше, оқиға 17 қарашада таңертеңгі уақытта болған. Қайғылы оқиға тұрғын үйдегі бейнебақылау камерасына түсіп қалған. Марқұмның көршісі басылымға оқиға қалай болғанын айтып берген.

«Оқиға таңертең болған. Видеодан Ерлан баспалдақпен түсіп келе жатып, тайғанап құлап түскенін көрдік», - дейді марқұмның көршісі Игорь Снаткин.

Оның айтуынша, бұл подъездегі баспалдақ тік болған. Тек бір жағында тұтқасы болған. Бірақ ол төмен түскенде, төртінші баспалдақтан басталады екен. Ал марқұм оны ұстап үлгермеген. Баспалдақтағы мұз тазаланбаған, оның үстіне, мұздан қорғайтын жапсырмалар жоқ болып шыққан.

«Қайғылы оқиғадан кейін жедел жәрдем мен полиция келді. Кешке дейін баспалдақ қан болып жатты. Оны ешкім жумады. Біз ПИК-ке айына 300-500 мың төлейміз, бірақ ештеңе істеп жатқан жоқ», - дейді көршілер.

Ал тұрғын үй инспекциясы өкілдері аула ішіндегі аумақтар қар мен мұздан асфальтқа дейін тазалануы тиіс екенін айтады.

«Қыста ғимарат иелері мен жалға берушілері баспалдақтарды, пандустар мен шатырларды қар мен мұздан тазартуды ұйымдастыруы керек. Қайғылы жағдайдың түпкілікті себебін тергеу қорытындысы бойынша ішкі істер органдары анықтайды», - деді Ақтөбе тұрғын үй инспекциясы өкілдері.