Билік Екібастұздағы жағдайға байланысты не жасырып отыр?

«Әділ сөз» халықаралық сөз бостандығын қорғау қоры Павлодар облысының билігі Екібастұздағы жағдай туралы ақпаратты жасыруға тырысып жатыр деп ойлайды, деп хабарлайды Bugin.kz порталы ҚазТАГ ақпарат агенттігіне сілтеме жасап .

«27 қарашаға қараған түнгі Екібастұздағы апатты жариялаған Павлодар және республикалық БАҚ журналистері «ресми ақпарат көздерінің» жұмысына наразы» делінген сәрсенбідегі хабарламада.

Қаланың ЖЭО-да жедел штаб ұйымдастырылды, оны Павлодар облысы әкімі Әбілқайыр Сқақов басқарады. Жедел штаб құрамына Екібастұз әкімі, ОАЭК және «Екібастұзтеплоэнерго», «Павлодарэнерго», коммуналдық қызметтер және т.б. басшылары кіреді. 

«Әділ сөз» халықаралық сөз бостандығын қорғау қорының мәліметінше, билік журналистердің өтінішіне қарамастан, жедел штаб брифингтер мен тікелей эфирлер өткізбеген.

«Облыс әкімінің баспасөз қызметі іріктелген пікірлерді кейде үш-төрт сағаттан кейін жібереді. Әсіресе теледидар жаңалығының алдында жібереді.

29 қарашада сағат 20:00-де Павлодар облысы әкімдігінің баспасөз қызметі сағат 22:00-де хабарлама жіберді. Онда Екібастұз ЖЭО-да ТЖ министрі Юрий Ильиннің қатысуымен премьер-министрдің орынбасары Серік Жұманғариннің төрағалығымен жедел штаб өтетіні туралы айтылған. Содан кейін брифинг бір сағат кейінге ауыстырылды. Осы уақыт ішінде журналистер Facebook-те тікелей эфирді күтті. Нәтижесінде әкімнің баспасөз хатшысы Мереке Нұрмұханова трансляция болмайтынын, видео БАҚ-қа жіберілмейтінін айтты. Бұған не себеп және кімнің бұйрығы екеніне журналистер жауап ала алмады», - деп атап өтті құқық қорғаушылар.

Журналистер 29 немесе 30 қарашада күндіз Екібастұзда не үшін брифинг өткізбегенін түсінбей отыр. Сонымен қатар бұқаралық ақпарат құралдары қалаға келе алатын болса, неге брифингті түнде және тікелей эфирсіз өткізгеніне наразы.

«Қазір аймақтағы билік жағдайды жасыруға тырысып жатқан сияқты. Сонымен қатар журналистер қаладағы «қатып қалған» үйлер бойынша оларға берілген мәліметтердің дұрыстығына күмән келтіреді. 28 қарашада олардың ресми саны бойынша 17 еді. Ал 29 қарашада бұл көрсеткіш 53 көппәтерлі тұрғын үйге (КТК) дейін өсті. Бұқаралық ақпарат құралдарына 700-ге жуық көппәтерлі тұрғын үйі бар қаланың түкпір-түкпірінен шағымдар келіп түсіп жатыр. Соның кесірінен қала тұрғындары БАҚ-та айтылған ақпаратқа байланысты журналистерді өтірік айтты деп айыптайды», - деп толықтырды «Әділ сөз» мүшелері.