Ресей Украинаға қарсы ядро қолдана ма: Путиннің нақты жауабы белгілі болды

Әлемде ядролық қаруды қолдану қаупі артып келеді. Бірақ Ресейдің «есі ауысқан жоқ» және оны әлі де тек қорғаныс құралы ретінде қарастырып отыр, деп хабарлайды Bugin.kz порталы inbusiness.kz-ке сілтеме беріп.

Бұл туралы Владимир Путин АҚК жаңартылған құрамымен онлайн-кездесуде мәлімдеді.

«Біздің жау шабуылына жауап ретінде қорғаныс құралдарын қолдану стратегиямыз - жаппай қырып-жою қаруын, яғни ядролық қаруды қолдану. Олардың барлығы кек алу деп аталатын соққының негізінде қарастырылған. Бізге соққы берсе, жауап қайтармай қалмаймыз», - деді Владимир Путин.

Сонымен бірге, Олаф Шольцтың пікірінше, Мәскеуге қысымның күшеюіне байланысты ядролық шиеленісу қаупі төмендеді.

Ресей президентінің мәлімдемесіне қатысты Вашингтон да пікір білдірді:

«Біз ядролық қаруды әңгіме етудің өзі жауапсыз әрекет деп санаймыз. Бұл Ресей БҰҰ Қауіпсіздік кеңесі аясында қол қойған ядролық соғысқа жол бермеу туралы мәлімдемеге сәйкес келмейді. Сондай-ақ осы өте қарапайым қағиданы растаған ресейлік шенеуніктердің мәлімдемелеріне қайшы келеді», - деді АҚШ Мемлекеттік департаментінің ресми өкілі Нед Прайс.