Саясат

Назарбаев тағы бір атағынан айырылды

Авторларды қолдау орталығы

mediabugin@gmail.com

Фото: bugin.kz

Қазақстанда «Құрметті сенатор» атағы ешкімге берілмейді. Бұл туралы сенат төрағасы Мәулен Әшімбаев айтты, деп хабарлайды Bugin.kz порталы ҚазАқпарат сайтына сілтеме жасап.

«3 апта бұрын регламентті қарап, сенаттың регламентіне тиісті өзгеріс енгізілді. Соның аясында біз «Құрметті сенатор» атағын регламенттен алып тастадық. Енді бізде ондай институт жоқ. 2022 жылы өткен референдумда бүкіл халық қолдап, Конституциядан елбасына қатысты нормалар алынып тасталды. Ертең тұңғыш президент – елбасы туралы заң күшін (парламент палаталарының бірлескен отырысында) жояды», - деді М. Әшімбаев сенаттың жалпы отырысынан кейін тілшілер сұрағына жауап бере отырып.

Сонымен қатар ол конституциялық соттың тиісті шешімі бар екенін еске салды.

«Сондықтан референдумды, заңның күші жойылатынын ескеріп, біз регламенттен «Құрметті сенатор» дәрежесін алып тастаған едік», - деді сенат төрағасы.

Осы орайда ол бұған дейін «Құрметті сенатор» атағы бір ғана адамға берілгенін айтты.

«Енді заңдарда «Құрметті сенатор» деген атақ жоқ. Оны бірден айтайын. Кезінде сенат регламентіне осы өзгеріс енгізілген. Осы регламентті қарап, өзгерткенде, («Құрметті сенатор» атағын – автор) алып тастадық. Бұған дейін ол бір-ақ адамға (Нұрсұлтан Назарбаевқа – автор) берілді. Енді мұндай атақ ешкімге берілмейді. Өйткені, қазір бізде ондай құқықтық негіз жоқ, оны алып тастадық», - деді Мәулен Әшімбаев.

Еске салсақ, 2019 жылы мамыр айында бұрынғы президент Нұрсұлтан Назарбаевқа «Құрметті сенатор» мәртебесі берілген еді.

Сол кезде «Құрметті сенатор» аса маңызды талқылауларға қатысатыны айтылған.