Өзбекстандағы аяз мәселелері: әйел коммуналдық жұмысшыға пышақ тақаған

Өзбекстанда әйел электр қуатын қалпына келтіруді талап етіп, электриктің тамағына пышақ тақаған. Оқиға видеоға түсіп қалған, - деп хабарлайды Bugin.kz порталы Nuz.uz сайтына сілтеме жасап.

Елдің Бас прокуратурасының мәліметінше, видео Ташкент облысында түсірілген. 16 қаңтар күні кешке Шыршық қаласының бір топ тұрғыны «Өңірлік электр желілері» жергілікті филиалының ғимаратына келген. Басқару бөлімінде олар үйлеріне электр қуатын беруді талап етті.

35 жастағы әйел электриктің тамағына асхана пышағын тақап: «Шырақты қосасыз ба, жоқ па?» деп сұрайды. Монтер тәртіп сақшыларының көмегімен босатылды, шабуыл кезінде ол ешқандай жарақат алмаған.

Әйелге қатысты «қоғамдық тәртіпті қорғау міндеттерін атқаратын билік немесе қоғам өкіліне немесе бұзақылық әрекеттердің жолын кесетін басқа да азаматтарға қарсылық көрсетумен байланысты бұзақылық» фактісі бойынша қылмыстық іс қозғалды. Ол шектеу немесе 3 жылдан 5 жылға дейін бас бостандығынан айырылуы мүмкін.

Gazeta.uz сайтының хабарлауынша, Өзбекстандағы электр қуатына қатысты мәселелерге 10 қаңтарда елге келген қалыптан тыс аяз себеп болған. Түнде ауа температурасы -20 градусқа дейін төмендеп, газ қысымының төмендігі мен электр желілеріндегі жүктеменің артуына байланысты апаттар орын алды.

Қысқы маусымға дайындықтың дұрыс жүргізілмеуіне байланысты Ташкент қаласының әкімі мен электр энергетикасына жауапты басқа да бірнеше шенеунік қызметтерінен айырылды.