Министрмен бір лифтіде: жүк тиеуші Қазнеттің жұлдызына айналды

ҚР Сыртқы істер министрі Мұхтар Тілеубердімен кездейсоқ бір лифтіге мінген азаматтың әрекеті Қазақстан халқын күлкіге қарық қылды. Бір күннің ішінде видео тиктокте миллионға жуық қаралым жинады, деп хабарлайды Bugin.kz порталы.

Желіде министрдің журналистерді қалай тастап кеткені туралы видео пайда болды. Ол БАҚ өкілдеріне сұрақтар бойынша баспасөз қызметіне хабарласуды сұрап, лифтіге кіреді. Ішіндегі жолаушы мұнша микрофондар мен камераларды күтпеген. Ер адамның әдеттен тыс әрекеті қазақстандықтарды күлдірді. Бейнежазба желіде жарияланғаннан кейін бейнебаянның кейіпкерінің есімі Айдостың танымалдығы арта түсті.

Анықталғандай, ер адам соңғы 10 жылдан бері Үкімет үйіне қызмет көрсететін мекемеде жүк тиеуші болып жұмыс істейді. Оның екі баласы бар. Оның абдырап қалған жүзі күннің хитіне айналғанын Айдос теледидардан біледі. Мұны туыстары мен достары қоңыраулар мен SMS-тер толтырып тастағанын да айтады. Қазір ол ұжымның жұлдызына айналып үлгерген.