Тікұшақ апатынан аман қалған инженер оқиғаны бастан аяқ айтып берді

Батыс Қазақстан облысында тікұшақ апатында екі адам тірі қалды. Біреуі – "Қазавиақұтқару" АҚ жетекші инженері Сергей Щеглов. Бұл туралы "Мой город" порталына сұхбат берген маман оқиға туралы айтып берді, деп хабарлайды Bugin.kz порталы.

Щеглов тікұшақтың артқы жағында отырған. Ал апаттан кейін екі креслоның ортасына түскен.

Апаттың қалай болғаны есімде жоқ. Басымнан қан ағып жатқанда есімді жидым. Екі креслоның ортасынан бірақ шықтым. Басыма шүберек басып отырдым. Сосын құтқарушылар келді. Оларға мың да бір алғыс! Темір-терсекті жылдам кесіп, мені шығарды. Әйтпесе, өзім шыға алмайтын едім. Тағы бір жігіт аман қалды. Бірақ маған жақындай алмады. Мен де өз күшіммен шығуға қорықтым. Себебі жан-жағымда дюраль істіктер шығып тұрған. Тікұшақ өртенген жоқ. Бірақ қатты мыжырайып, жартысы ғана қалды, - дейді Щеглов.

Инженердің айтуынша, тікұшақпен аспанға көтерілгенде бәрі дұрыс болған. Техникада да ешбір ақау байқалмаған әрі ауа-райы жақсы болған.

Біз үш сағаттай ұштық. Мен артта конспектілерімді оқып отырдым. Бәрі аяқ астынан болды. Есімді жисам, жерде жатырмыз. Негізі тікұшақ өте жақсы болған. Біріншіден, 2022 жылы шығарылды, жап-жаңа техника. Апаттың неден болғанын түсінбей отырмын, - деді Щеглов.

Сергейдің өзі "Қазавиақұтқару" компаниясында В2 санатындағы инженер қызметін атқарады. Еңбек өтілі – 43 жыл. Тікұшақтың радио және электр құрылғыларын тексеріп жүреді.

Қаза тапқан инженер қозғалтқыштарға жауап берген. Мен өзім Атыраудан боламын. Сол жақта ауырып қалған адамдарды және жүкті әйелдерді тікұшақпен тасимыз. Ал осы жолы бізді құтқарды. Барлық мамандарға алғыс айтамыз, - деді аман қалған инженер.

Еске салайық, таңертең БҚО-да тікұшақ апатқа ұшырап, 4 адамның қаза тапқанын хабарлаған едік.