Алматы облысында Наурыз мерекесі кең көлемде атап өтілді

Алматы облысында Наурыз мерекесі кең көлемде атап өтілді. Өңірдің түкпір-түкпірінде ұлттық спорт түрлерінен жарыстар, халқымыздың тарихынан сыр шертетін көрмелер ұйымдастырылды.

Алматы облысының орталығында Ұлыстың ұлы күнін тойлату ағаш отырғызу рәсімінен басталды.

Рәсімнің шымылдығы қариялардың ақ батасымен ашылып, өңір басшысы Марат Сұлтанғазиев жиналған жұртшылықты мерекемен құттықтады. Облыс әкімі 1-шағын аудандағы 17-үйдің ауласына жасыл желек егіп, қазақтың 7 түрлі дәмі қойылған дастарханнан ауыз тиді. Бұл рәсімнен кейін орталық алаңда қалың көрермен назарына концерттік бағдарлама ұсынылды.

Бұдан бөлек, облыс әкімі Марат Сұлтанғазиев ат басын тіреген Қарасай ауданында дәстүр, ұлттық құндылықтар, шебер қолдар секілді бірнеше тақырыптарға арналған қазақ үйлер тігілген. 

Әрқайсымен жеке танысқан өңір басшысы киіз үйдің бірінде қаскелеңдік сәбидің тұсауын кесті. 

Мерекеге орай орталық алаңға жиналған жұрттың қарасы да көп болды. Шарада күміс көмей әншілер асқақтата ән шырқап, бишілер мың бұрала би биледі.

"Бұл мереке адамдардың ұлтына, дініне қарамай біріктіретін мейрам. Қарасай ауданы тарихы тереңде жатқан, көпұлтты ауданның бірі. Бүгінде мереке осындай деңгейде тойланып жатқанына қуаныштымын. Құрметті жерлестер, Ұлыстың ұлы күні құтты болсын! Ақ мол, ырыс-берекеміз тұрақты болсын!" - деді Марат Сұлтанғазиев өзінің құттықтау сөзінде.

Ал Жамбыл ауданының Көкбастау атшабарында өткен шараға 12 мың көрермен жиналды. Бүгін мұнда 3 тонна бауырсақ пісіріліп, 2 000 литр наурыз көже ішілді. 

Бұл жерде қазан-қазан наурыз көже жасалғаннан бөлек, тазы жарысы, Құнан және Аламан бәйге, көкпар өтті. 9 шақырымға шапқан құнандардан бірінші болып келген "Үміт" атты сәйгүліктің иесі мотоцикл ұтты. Ал 2-орынға "Шегірқасқа" табан тіресе, 3-орынға Жамбыл ауылының "Зухра" сәйгүлігі ие болды. Құнан бәйгеде 25 сәйгүлік өзара тартысқа түсті.

21 шақырымдық Аламанда Ринат Әділқас жаттықтырған "Тасқара" басқалардан оқ бойы озып келді. 1-орынды иеленгендерге "Лада Гранта" маркалы автокөліктің кілті табыс етілді. 2-орынды "Ботагөз", 3-орынды "Көзмоншақ" қанжығасына байлады. Бәйгеге 37 сәйгүлік қатысты.

Ұлттық мереке мен ұлттық ойын ұлықталған шарада облыс әкімі Жамбыл ауданы тұрғындарын Наурыз мерекесімен құттықтап, ақжарма тілегін арнады.

Жиналған қауым да құшақтасып көрісіп, бір-біріне ізгі сөздерін айтып жатты.

"Ұлыс оң болсын, балалар! Қашанда Қазақстанның көк туының астында ынтымақта, бақ-берекеде өмір сүрейік! Денсаулықтарың мықты болсын! Бүгінгі өтіп жатқан шара бәріміздің көңілімізден шықты", - деді өзінің пікірінде жамбылдық ақсақал.

Ал Талғар ауданы Бесағаш ауылында Мәдениет үйі қолданысқа берілді.

Шараға Алматы облысының әкімі арнайы қатысып, тұрғындарды Наурыз мерекесімен және Мәдениет үйінің ашылуымен құттықтады.

Өңірдегі мәдениет басқармасының басшысы Әлия Жақыпбекованың айтуынша, нысан 260 орындық. Қазіргі таңда Мәдениет үйінің қызметкерлері толық жасақталып, жұмыс жасауға әзір болып отыр.

"Бүгін Наурыз мерекесіне орай нысанның халық игілігіне берілгеніне куә болып отырмыз. Мұнда вокал, би, тағы басқа үйірмелер ашылады деп жоспарлап отырмыз", - деді басқарма басшысы.

Салтанатты ашылу рәсімінде дүйім жұртқа аты мәшһүр суретші Амандос Ақанаевтың көрмесі ұйымдастырылды. Сондай-ақ облыстық Сүйінбай атындағы филармониясы әншілері, күйші Секен Тұрысбековтің, "Ақжауын" оркестрінің концерті өтті.