Алматы облысында баласын далада қалдырып кеткен ана табылды

Алматы облысы Қарасай ауданында қоларбада жатқан бала табылды. 

Оқиға 15 мамырда болған. Далада қоларбада жатқан ата-анасыз баланы тұрғындар тауып алып, полицияға хабарласқан.

"Қарасай ауданының полиция бөліміне сағат 10:08 шамасында БАКАД Атом жолының 5 шақырмында сәбидің табылғаны туралы хабарлама түсті. Аталған жерге дереу полиция жасағы жіберіліп, көп ұзамай баланың анасы табылды", - дейді ПД баспасөз қызметіндегілер.

Полиция өкілдерінің айтуынша, анасы баласын тастамаған.

"Баланың анасы телефон шалу үшін байланысы бар жер іздеп, жолдың арғы бетіне өтіп кеткен. Әйел адамның материалдық жағдайы жақсы, ақыл-есі дұрыс, толыққанды азамат", - дейді ведомстводағылар.

Іс жүзінде тәртіп сақшылары анасына қатысты Әкімшілік құқықбұзушылық кодексінің 127-бабы 1-бөлігі "Кәмелетке толмаған адамды тәрбиелеу және (немесе) оған білім беру, оның құқықтары мен мүдделерін қорғау жөніндегі міндеттерді орындамау" бабымен хаттама жасап, түсіндірме жұмыстарын жүргізді.