Ақтөбеде қылмыс жасаған әйелі мен күйеуі 11 жылға сотталды

Ақтөбеде есірткі таратумен айналысқан ерлі-зайыпты 11 жылға сотталды, деп хабарлайды Bugin.kz порталы Polisia.kz сайтына сілтеме жасап.

"Өткен жылдың соңында Ақтөбе облысы полиция департаментінің есірткі қылмысына қарсы іс-қимыл басқармасының қызметкерлері арнайы жасақпен бірлесіп мақсатты жедел-іздестіру шараларын жүргізу барысында Ақтөбе қаласында 27 жастағы әйел мен 40 жастағы ер азаматты ұстады. Медициналық куәландыру қорытындысына сәйкес, ерлі-зайыптылардың екеуі де есірткілік мас күйде болған. Оларды жеке тінту, тұрғылықты жерін және есірткі қойған жерлерін тінту барысында жалпы салмағы 1,5 келіні құрайтын синтетикалық психотроптық заттар тәркіленді" делінген хабарламада.

Бұл деректер бойынша Қазақстан Республикасы Қылмыстық кодексінің 297-бабының 3-бөлігі бойынша қылмыстық іс қозғалды.

2023 жылдың мамыр айында Ақтөбе қаласының қылмыстық істер жөніндегі мамандандырылған ауданаралық сотының шешімімен ерлі-зайыптылар сату мақсатында аса ірі көлемде психотроптық заттарды сақтағаны мен тасымалдағаны үшін кінәлі деп танылып, 11 жылға бас бостандығынан айырылды.