Атырауда мәдени нысанды жөндеуге бөлінген жарты миллиард кері қайтарылды

Атырауда мәдени нысанды жөндеуге бөлінген жарты миллиард теңгені құзырлы органдар қазынаға кері қайтарып жатыр, деп хабарлайды  Bugin.kz порталы КТК телеарнасына  сілтеме жасап.

Қаладағы Құрманғазы мәдениет үйін күрделі жөндеуден өткізуге мәдениет басқармасы 449 миллион теңге бөліп, мердігерді де анықтап қойған. Алайда тендер ұйымдастыруда заңсыздықтар анықталған. Тарихи-мәдени нысандар қатарына жататын мәдениет үйін жөндейтін компанияның арнайы лицензиясы болмай шыққан. Сондықтан жарты миллиард теңгені жеңіп алған құрылыс компаниясы қайта жаңғырту жұмысын жасай алмайды. Қазір прокуратура мемлекеттік сатып алу шартының күшін жойып, тапсырыс берушіні жауапқа тартып жатыр.

Атырау қаласы прокурорының орынбасары Мирас Жалмұрзиннің айтуынша, прокуратураның  араласуымен құны 449 миллион теңге болатын мемлекеттік сатып алу шартының күшін жою туралы уәкілетті органға талап хат жолданған.

"Кінәлі тұлғалар Әкімшілік құқықбұзушылық туралы кодексінің 447-бабына сәйкес әкімшілік жауапқа тартылды. Және айыппұлын төледі. Мемлекеттік мекеме осы мемлекеттік сатып алу туралы заң талаптарын сақтай отырып, арнайы құжаттарын реттеуі қажет", - дейді Жалмұрзин.