Жетісайда алып қашып кеткен қыздың қолхат жазуы көпшіліктің таңданысын тудырды

Жетісайлық жас келіннің қолхат жазуы көпшіліктің таңданысын тудырып, қызу талқыға түсті.

Әлеуметтік желіде жас келіннің қолхат жазып отырған видеосы тарады. Онда орамал таққан қыз өз еркімен келін болып келгенін жазады. Ешкім мәжбүрлемегенін, күйеу жігіттің үйіне өз еркімен келгенін, ешкімге шағымы жоқ екенін қағазға түсіреді. Видеодан қолхат жазуға үйдегі үлкендер жағы көмектескені анық көрініп тұр. Тіпті, жасы үлкен әйелдер жазатын әрбір сөзді рет ретімен айтып отыр.

Аталған оқиға Жетісай ауданында болған. Көпшілік оқырмандардың сөзінше, жас қызды сол үйдің баласы келін етіп алып қашып келген.

"Аталған бейнежазбадағы жайт бойынша Жетісай ауданының полицейлері бірден тексеру жұмыстарын жүргізді. Нәтижесінде Асықата кентінің 24 жастағы тұрғынына 20 жастағы қыздың өз еркімен тұрмысқа шыққаны анықталды. Жас қызбен сұхбаттасу барысында, ол ешкімге қояр арыз-шағымы жоқ екенін, ешқандай заң бұзушылық болмағанын жеткізді", - делінген Түркістан облысы полиция департаментінің баспасөз қызметі таратқан хабарламада.

Ал желідегі жазбаға пікір білдірушілердің басым бөлігі жас отбасына бақыт тілесе, енді бір бөлігі қолхат жазған қалыңдықтың ісіне таңданысын білдірді.