Төрт мұғалімнің қазасы: Ақтөбедегі жол апатына қатысты қылмыстық іс

Самара-Шымкент тасжолының Қобда ауданы аумағында болған жол апатына кінәлі деп танылып, қамауға алынған жүргізуші сот алдында жауап береді. Қылмыстық іс сотқа түсті.

Ақтөбе облыстық сотының баспасөз қызметінің хабарлауынша, 4 мұғалімнің өліміне әкеп соққан жол-көлік апатына қатысты іс сотқа түсті.

"Қылмыстық кодекстің "Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы" бабы бойынша айып тағылған жүргізуші қазір қамауда отыр. Сот Қобда аудандық сотында қаралады. Сот алды тыңдау уақыты таяу күндері белгілі болады. Іс сотқа түсті",- деп хабарлады облыстық соттың баспасөз қызметі. Егер жүргізушінің кінәсі дәлелденсе, ол 5 жылдан 12 жылға дейінгі мерзімге бас бостандығынан айырылуы мүмкін.

Еске салсақ, 1-маусым күні жеңіл көлік алдында келе жатқан жүк көлігіне соқтығысты. Апат салдарынан "Лада Ларгус" автокөлігінің үш жолаушысы оқиға орнында қайтыс болса, Біреуі ауруханада көз жұмған еді. Кейін олардың оралдық мұғалімдер екені белгілі болды.