Шымкентте полицей қағып кеткен әйелдің жағдайы белгілі болды

Шымкентте полиция қызметкері патрульдік көлікпен қағып кеткен әйел қаза болды.

Дәрігерлердің айтуынша, 39 жастағы науқас ауыр жағдайда түскен. Бас-ми жарақаты, миға зақым келген, қан құйылу және мидың ісінуі диагнозы қойылған. Жансақтау бөліміне жатқызылып, барлық қажетті емдеу шаралары жүргізілгенімен, әйелдің жағдайы нашарлап, қайтыс болғаны хабарланды.

"Жүргізіліп жатқан емдеу шараларына қарамастан науқастың жағдайы нашарлады, 7 тамызда биологиялық өлім анықталды. Оның себебі – мидың ісінуі, дислокация синдромы", – дейді №1 қалалық клиникалық аурухананың бөлім меңгерушісі Оңалбай Нарманов.

Полицей қағып кеткен екінші адамның жағдайы орташа ауыр.

Еске сала кетейік, 3 тамызда Байтұрсынов көшесінің бойындағы жаяу жүргіншілер өткелінде Тұран аудандық полиция бөлімінің жүргізуші-полицейі қызметтік көлігімен 2 жаяу жүргіншіні қағып кеткенін хабарлаған едік. Жол-көлік оқиғасы бойынша тергеу жүріп жатыр.