Қызылордада тағы бір балалар лагерінің былығы ашылды

Қызылордалық прокурорлар балаларға арналған жазғы тынығу лагерьлеріндегі былықтың бетін ашты.

Шиелі ауданының лагерінде азық-түлік ескі дәретхана бөлмесінде сақталған. Бұл лагерьде жуынатын жер де жоқ болып шыққан.

Қазалылық балалар суы лас бассейнде шомылып келген. Одан бөлек, микробиологиялық зерттеу нәтижесінде асхана ыдысынан ішек таяқшасы табылды.

"Сырдария ауданындағы лагерьде төсек-орын жабдықтары дезинфекцияланбаған. Басқа да санитариялық-эпидемиологиялық нормалар сақталмаған. Лагерьлер жақсы күйде емес. Ғимараттары ескі, кейбіреулері күрделі жөндеуді қажет етеді", - делінген облыстық прокуратура хабарламасында.

Айта кетейік, биыл осындай демалыс орындарына баруы керек 8 мыңға жуық баланың 4,5 мыңдайы әлі кезегін күтіп жүр екен.