Kazakh Nostalgia Fest - аға буын мен жаңа толқын қатысқан кеш

26 тамызда Алматыдағы "Сұңқар" халықаралық трамплин кешенінде Kazakh Nostalgia Fest концерті өтті. Биылғы жаздың соңғы көңілді кештерінің бірін тамашалаған Bugin.kz тілшісі фестивальдің қызықтары жайлы мәлімет ұсынады.

Кімдер қатысты?

Фестивальдің ерекшелігі 2000 жылдың танымал композициялары мен қазіргі уақыттың ең үздік хит әншілерінің өнер көрсетуі болды. Концертке Ghetto dogs, Métis’s, Мақпал Исабекова және Dequine, Askha Prince, Мирас Жүгінісов, т.б. өнер жұлдыздары қатысты.

Кешкі сағат бесте басталған іс-шара 5 сағатқа созылды. Көрермен әр сағат сайын көбейді. Жаңа толқын мен ескі буын әншілерінің сүйікті тыңдармандары олардың ешқайсысын қошеметсіз қалдырмады. Бірі қосылып шырқап ән айтты, екіншісі билеп шабыттандырды. Әсіресе, Мақпал Исабекова мен Мирас Жүгінісов, Dequine-ге халықтың ықыласы ерекше болды.

"Халықты қатты сағындым"

Әншілер де халықпен сағынысып көрісті. Бұлардың қатарында Мақпал Исабекова да бар. Өнер иесі 3-4 жылдан бері осындай шараларға қатыспағанын айтты.

"Мұндай концерттерге көптен  қатыспағандықтан, мен үшін өте үлкен тәжірибе болып отыр. 
Халықты сағынғаным сонша, сахнада да сөйлегенімнен, өнер көрсеткенімнен байқалған болар. Екі толқын арасындағы бұл кеш фанаттарға толы болды. Мен олардың ешқайсысын бөлмес едім. Себебі барлығымызды музыка байланыстырады. 

Сол арқылы тіл табысамыз, жақсы көреміз. Мәселен, 20 жылдан бері мені тыңдап келе жатқан оқырмандар, жаңа танып жатқандар бар. Бастысы, сені тыңдайды, музыкаң үшін жақсы көреді. Өзім Бритни Спирс, Майкл Джексон әнімен өстім. Қазіргі жастардан DeQuine, Sadraddin, Мирас Жүгінісовтердің шығармашылығы ұнайды", - деді әнші Мақпал Исабекова.

"Қазақстанда ең жас көрермендерім бар"

Әлемдік аренада өнер көрсетіп жүрген Камал қазақстандық көрермендер ең жасы екенін атап өтті.

"Бұған дейін көптеген концертте өнер көрсеттім. Ал бүгінгі фестивальдің форматы да атауы сияқты ерекше. Бұл жерде ескі буын әндерін тыңдай отырып, жаңа әншілермен де таныстық. Америкада, Еуропада тыңдаушыларым көп болғанымен, ең жасы қазақстандықтар деп айтар едім", - деді өнер иесі.

"Әр буынның өз мықтысы бар"

Жас буынды жиі тыңдап, қолдайтынын айтқан Гетте Догс музыканың кәсіби тұрғыда дамып келе жатқанына қуанатынын жасырмады.

"Әр фестивальдің өз ерекшелігі бар. Мысалы, кейбір мерекелік шараларға арнайы әншілер ғана шақырылады. Ал мұнда ескі буын мен жаңа толқынды біріктіре отырып, басымыз қосылды. Әр толқынның өз көрермені бар. Мәселен, жастар үшін Dequine ең мықты әнші болса, біздің буынның да өз мықтылары болды. Жалпы жастар еркін әншілерді жақсы көреді ғой. Жаңа шығып жатқан әншілерді жиі тыңдаймын. Оның ішінде өзінің стилі бар, талантты әншілер көп. Оларға шығармашылық табыс тілеймін. Біздің музыканың кәсіби тұрғыда әр бағытта дамып, өскеніне қуанамын", - деді ол.  

"Ұйымдастырушылар ерекше колобрация жасады"

Ал 2000 жылдың хит болған жұлдыздары Metis’s тобы осындай ерекше колобрация үшін ұйымдастырушыларға алғысын жеткізді.

"2000 жылғы және кейінгі толқын әншілерін біріктірген бұл фестиваль жоғары деңгейде өтті. Ұйымдастырушылар  ерекше колобрация жасады. Бұл басқаларға да сабақ болу керек. Жиі өткізілсе, жақсы болар еді. Жалпы үлкен буын мен кіші буын арасында айырмашылық жоқ. Тек қана біз өткен жылда, жаңа толқын қазіргі сәтте өмір сүріп жатыр. Сергей Жуков, Милениум мен үшін ностальгия деп айтар едім. Соларды тыңдап өстім. Ал қазіргі әншілердің үздік үштігі Скриптонит, Jan Khalib, Dequine деп атар едім", - деді ол.

Kazakh Nostalgia Fest халықтың сүйікті өнер жұлдыздарына деген сағынышын басқан кеш болды. Сондай-ақ фестивальде түрлі ұтыс ойындары ойнатылып, бағалы сыйлықтар табысталды.