Тоқаев қазақстандықтардың не себепті шектен тыс қарызға батқанын айтты

Тоқаев қаржы нарығындағы қазіргі ахуал туралы жолдауда айтты, деп хабарлайды Bugin.kz порталы ҚазАқпарат агенттігіне сілтеме жасап.

"Мұндай ахуал Үкіметті тікелей қаржыландырумен, кепілдік және субсидия берумен айналысуға мәжбүрлейді. Бұл тәсіл тиімсіз, көп қаражатты талап етеді әрі нарықтық экономика қағидаларына қайшы келеді. Сонымен бірге, нақты секторға берілетін кредит азайып жатқанда банктер тұтыну несиесімен әуестеніп кетті. Осы жағдай қаржы жүйесіне төнетін сын-қатерлердің көбеюіне және азаматтардың шектен тыс қарызға батуына әкеп соқтырды", - деді Қасым-Жомарт Тоқаев Қазақстан халқына Жолдауында.

Мемлекет басшысы мәлімдегендей, 2019 жылы 500 мың азаматтың кепілсіз несиесін кешіру туралы шешім және жақында қабылданған жеке тұлғалардың банкроттығы туралы заң мәселені біршама реттеді.

Мнмлекет басшысының айтуынша, ахуалды біржола түзеу үшін жаңадан жүйелі шаралар қабылдау қажет.

"Азаматтардың қаржы сауатын арттыру өте маңызды. Бұл ретте «Amanat» партиясының «Қарызсыз қоғам» жобасын ерекше атап өту қажет. Соның арқасында еліміздің 8 аймағында 20 мыңнан астам адам қаржылық сауатын арттырды. Олардың көпшілігі – 10 және одан да көп несие алған адамдар. Бұл жоба аз уақытта өзінің тиімділігін көрсетті. Үкіметке "Amanat" партиясымен бірлесіп, оның ауқымын кеңейтуді тапсырамын. "Қарызсыз қоғам" жобасының игілігін бүкіл еліміз көруі қажет", - дейді ол.