Өскеменде көпқабатты үйге қасақана өрт қойылған

Өскемен қаласында біреу қасақана өрт қойған көпқабатты үйден 15 адам құтқарылды, деп хабарлайды Bugin.kz порталы ҚазАқпарат сайтына сілтеме жасап.

ШҚО Төтенше жағдайлар департаменті баспасөз қызметінің мәліметіне сүйенсек, бүгін қаладағы Қабанбай батыр көшесінде орналасқан 6 қабатты тұрғын үйде өрт шықты. Оқиға орнына құтқарушылар шұғыл келіп жетті.

"Өрт сөндірушілер барлау жүргізіп, үшінші қабаттағы пәтерді қою қара түтін басқанын көрді. Ең алдымен, олар автосатының көмегімен 15 тұрғынды құтқарды. Оның төртеуі - бала", - делінген ақпаратта.

Одан кейін көпқабатты үйден 34 адам эвакуацияланды. Оның ішінде алтауы - бала.

"Өрт сөндірушілер қою түтін арасында отпен күресуге және адамдарды құтқаруға мәжбүр болды. Үйлесімді іс-қимылдардың арқасында жалпы ауданы 40 шаршы метр тілсіз жау толықтай ауыздықталды. Ешкім зардап шекпеді", - делінген хабарламада.

Қызыл жалынмен күреске барлығы 10 техника және жеке құрамнан 42 адам жұмылдырылған. Алдын ала болжам бойынша, біреу пәтерге қасақана өрт қойған.