Алматы облысында үш жасар бала кәріз құдығына түсіп көз жұмған

Алматы облысында балабақшада үш жасар бала кәріз құдығына түсіп көз жұмды. Қайғылы оқиғаны Алматы облыстық полиция департаментінің басшысы Бауыржан Әленов мәлімдеді, деп хабарлайды Bugin.kz порталы.

13 қыркүйек сағат 13:08 шамасында Еңбекшіқазақ ауданы Қырбалтабай ауылында үш жасар бала балабақшаның бірінің аумағында ашық кәріз құдығына құлаған. Ол ауыл ауруханасында көз жұмды.

“Аталған дерек полицияда ҚР Қылмыстық кодексі 141-бабының 2-бөлігі “Балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау”  бойынша тіркелді.

Қазіргі уақытта оқиғаның барлық мән-жайын толық, объективті және жан-жақты зерттеу үшін қажетті сараптамалар тағайындалып, тергеу іс-шаралары жүргізіліп жатыр”, – деп хабарлады полиция департаментінің өкілі.

Тергеу барысын Әленов жеке бақылауына алғанын мәлімдеді. ҚР ҚІЖК-нің 201-бабы тәртібінше, өзге ақпарат жария етілмейді.