Бұрынғы кеншілер алтынды заңсыз өңдеген

Ақмола облысының Бестөбе кентінде кенді қайта өңдейтін заңсыз цех пен алтын таситын шахтаға жасырын өтетін жол анықталды. Үй-жайлардың иелері құрамында алтыны бар кенді өндіру мен өңдеудің ерекшеліктерін жақсы білген. Енді заң бойынша оларға ірі көлемде айыппұл салынады немесе қамауға алынады, деп хабарлайды    Bugin.kz порталы Sputnik Қазақстан  сайтына сілтеме жасап.

Құрамында алтыны бар материалды қайта өңдеу цехын Ақмола облысы полиция департаменті ұйымдасқан қылмысқа қарсы күрес басқармасының қызметкерлері мен "Қазақалтын" ЖШС қауіпсіздік қызметі анықтаған.

Бестөбе өндірістік алаңы "Қазақалтын" компаниясына тиесілі.

Жедел ақпаратқа сәйкес, цех шаруашылық ғимаратының үй-жайында орналасқан. Жасырын цехта қолөнер өндірісінің шарлы ұсатқышы, жуу үстелі, ұнтақтағыш және кенді өңдеуге арналған басқа да жабдықтар тәркіленді.

Тәркіленген заңсыз заттардың барлығы жойылды. Құқық қорғау органдарының мәліметінше, үй-жайдың иесі бұрын қылмысты болмаған Бестөбе ауылының тұрғыны.

"Сол күні үйдің сарайындағы шахтаға апаратын жасырылған заңсыз өткел табылды. "Құбыр" деп аталатын жасырын өткел арқылы шахтаның 45-ші көкжиегіне түсуге болады", – делінген кәсіпорынның хабарламасында.

Заңсыз өткелдің иесі бұрын шахтаның аумағына заңсыз кіргені үшін бірнеше рет жауапқа тартылған және базада заңсыз іздеуші ретінде тізімделген. Бұл жолы ер адам ақылы түрде "алтын іздеушілерге" шахтаға заңсыз түсуге көмектескен.