Алматыда құрылыс дүкенінен өрт шығып, тұрғын үйді шарпыды

Алматыда жеке үйдің ауласында орналасқан құрылыс дүкені өртенді, деп хабарлайды Bugin.kz порталы.

Қалалық Төтенше жағдайлар депаратаментінің мәліметінше, 25 қыркүйек, түнгі сағат 02:29 кезінде «101» пультіне Алмалы ауданы, Брусиловский көшесі, 118 мекенжайында өрт шыққаны туралы хабар түскен.

Департамент: "Алғашқы өрт сөндіру бөлімшелері келген кезде жеке тұрғын үйдің ауласында орналасқан құрылыс дүкені өртеніп, жалын үйдің шатырына таралып үлгерген. Қызыл жалын 290 шаршы метр аумақты шарпыды", – деп мәлімдеді.

Жалын сағат 03:04-те оқшауланып, 03:51-де толығымен жойылды.

"Өрт сөндірушілер оңтүстік және солтүстік жағында орналасқан екі жеке тұрғын үйді оттан қорғап қалды", – деді ТЖД баспасөз қызметі.

Ведомство атап өткендей, тілсіз жаумен күрес кезінде өрт сөндіру бөлімінің қарауыл бастығы қолынан жарақат алған. Қазіргі уақытта оның өмірі мен денсаулығына қауіп жоқ.