Түркістанда бірнеше азамат мәслихат депутатын үйіне келіп сабап кеткен

Түркістан облысында мәслихат депутатына шабуыл жасалды. Бір топ бұзақы Руслан Насыровты дәл үйінің алдында оңбай сабап кеткен, деп хабарлайды Bugin.kz порталы КТК арнасына сілтеме жасап.

Түнде тойдан қайтып келген халық қалаулысын есік алдынан он шақты жігіт күтіп алыпты. Көп әңгімеге келместен, ашулы топ мәслихат депутатына жұдырық ала жүгірген.

Оның таяқ жеп жатқаны аулаға қойылған бейнекамераға түсіп қалыпты. Руслан Насыровтың айтуынша, бұл кикілжіңге жер дауы себеп. "Заңсыз жер телімдерін қайтарғаным бұрынғы депутатқа ұнамай қалды" дейді.

Төбелеске қатысқандар саны көп болғанымен, бұл екі адамның арасындағы араздық дейді полицейлер. Қазір қос бірдей баппен қылмыстық іс қозғалып, төбелеске қатысқандардан жауап алынуда.

"Жанжал кезінде олардың бірі екіншісін ұрып, мүлікті бүлдіргенін айтып көрсеткен. Оқиға орнына жедел тергеу тобы шықты. Аталған жайт ҚР ҚК екі бірдей бабымен тіркелді. Айғақ зат ретінде бейнежазба алынды. Оқиғаның мән-жайы анықталу үстінде", - деді Түркістан облысы ПД баспасөз хатшысы Гүлнәр Әбдіжаппар.